Wednesday, August 20, 2008

I pau diktak uh koi hiding hiam?

By Tongluang News Service
Tuesday, 19 August 2008
- S Muandoulian Ngaihte, Editor, Tongluang
Pau laklak ah Paite pau haksapen chi leng i khial lawmlawm kei dingin ka gingta hi. Bangziakin? Unau Mizo leh Hmarte banah namdangte’n leng Paite pau haksa asa sese uhi. Tuni chiangin eilak mahmah ahleh kampau in zaw thu tuam, agelh lam ah asiamthei mahmah lou leh agelh thei hetlou ki om hi. Hiai ka chihna ziakin, kei mahmah leng Paite a laigelh dingin ka kimuang kei hi. Mi bangzahhiam in zaw athu simnop huai a sa maithei uh, himahleh, mi bangzahhiam in bel agelh en in a sim ua, ka gelh Paite pau diktak ahi kei chi thei mawk ding uhi.

Tuma deuh in Pu Chinzam Tawmbing in ‘Paite laigelhdan diktak’ chih thupi pansan in article ahon gelh a, huai zoh in Pu Eugene Chinzahao in dawnna honpia hi. Hiai tawh kisai hun sawtpek apan keileng kana buai gige ahi a, i buaina pipen uh bel, O leh OU banah AW khong ahi tangpi in ka thei hi. Khanghakte’ apan in hiai Pu Chinzam Tawmbing laigelh pom haksa a sakdan uh tamtak feedback ka mu a, tuni chiang a ding a applicable nawnlou ahi tamtak in a chi uhi. Huan, Eugene a leng hoihsa tamtak om mahleh a kim lou deuh ahi chi nawn uhi. I pau uh gelh ding dan buaihuai petmah hi. Tongluang ka lak tung apan in hiai ding ahi na zat zawk ding, chi lah beilou. Huai ding hilou, hiai di ahi chi lah beilou, buai in kibuai hi. PLS bang hat vet hi a, i laigelhsiam, newspaper Editor leh reporter-te banah Magazine saite tawh workshop khat neih a, pai dingdan tangpi hon lamkaih uh deuhhuai mahmah hi. Zuih mumal lah omlou, mahni hoihsak dan ngen a kigelh siak, tua bang zel a i pai leh i pau mangthang hak nawnlou ding hi.Pu Chinzam Tawmbing te’n ahihleh, A AW B Ch... a pai ding, english toh kikop louh ding, chi ua, a lehlam ah, PLS in, english toh gawm ding, Pu Chinzahao in a aw ginnem na dia J bang hon zang thepthup. Tulai khangthakte’n a tangpi in A Aw B Ch ana zil khaklouh ziakun huaipen a tua va kibulpat ding haksa sa uhi. Meitei-te’n Meitei Mayek zat ding a phutluih uh toh kibang lehang kilawm hi. Ahi in tuh, bangteng hileh, common a zatkhawm theih leh zuih tangpi ding thukhat saat khiak tuh a hun mahmah ta hi. I Paite Laisiangthou ulah, Paite pau hia hilou chih theihzoh louh a gelh a gelh buai nawn geet zel. Tunitan a gen mangmoh a omlai tel.Pai dan mumal lou a om a, a khonung a kisik vengvung sangin tu a hunlai in panla ni. A kikhel nai kei hi. I pau diklou leh gelhdan diklou ahi kei a, bangmah theilou i pau amau leh amau kisual sak ihi zaw uhi. Huaiziakin, bangmah theilou kina saksak lou in, hoihtak a omkhawm theihna ding un thukhat saat khiak sawm ni. Tulai 21st century a om hita ua, a khovel paidan toh bang leng ki adjust hong poimoh maithei a, huchi ahih kei taak a, i pu-pa khang ua hiai ahi i zuih uh/i zuih ding uh chi a lem i sak leh leng a poi hilou hi. Bangteng i gen hangin, a poimoh zaw, common a zuih ding khat bawlkhiak ahi hi. - Tongluang, August (Kaukha) Editorial.

No comments: