PU ZO SUONTE SIENMÂNG ZÂLAH SINLUNG HUOLTON VAI

"Sanggamte aw, na lah vuah kikhenna a omlo na dingin nohaw zosie khat le khat kithutuoh dimdiem in, lungsim kibanga tupna khat sung ah na kigawm ton nading vun Topa Jesu Khris min tawh kang thuum hi" (I Corin 1:10).

(Zoham pen zumpi ding hilo hi. I ham in i lungsim ei kinaisah hi )

Article by Rev. Khup Lien Pau(MMFC)

Khatvei laiin Germany gam a om Berlin khuopi ni suona leh nitumna ciin, kikhen a, a kikal ah kidal na ‘kawm’ pen minthang mama hi. Tua kawmdal pi zieh in Berlin khuopi pen khuo khat hina pi in, zahdan leh ki-uhna a tuom tuoh in nei uh hi. A hizongin Berlin khuopi khen ni a suohsah kidalna kawmpi ang sietmang ciengin ang kigawmton theikia hi. Tuni in, i Zo mite sung ah Lungsim kigawmton theilo, lungsim tanglen a om sah kidalna kawmpi om deidoi thei kha ding hi. “Kidalna kawm” i ci pen, ei lie, ei dal, gamgi banga, ei khen vengvong ci na ahi hi. Tua kideidanna 'kawm' in i khantona ding ei kihehsah a, khat veivei ei khahtan thei lai hi. Mailam khanto nading ei dal, kideidan na kawmte phelmang vai. Bang kidal na kawmte i nei ei?

1. Kidéidànna Kawmte phélmáng vài

Topa Jesu in, "Khat le khat kilem in om un" (Mark 9:50) ci'n gen hi. I hlagau lam hinna ah ih guol dangte tawh kilemlona 'kawm' kidalna pi ih nei kha ei mà? Tami kideidan na 'kawm' dal in Zo mite ei thelthang sah hi. Minam khat leh nam khat kikal, Be le Be, Phung khat le Phung khat kikal a kidangmu na, kideidan na leh ki-elnate in, ih NAM suolsah mama hi. Laisiengtho lui hunlai in Egypt mite in Israel mite muda in kii-dah mama uh hi. Tuaban ah Judah minamte leh Siamazih minamte kikal ah kideidan na kawm nasia mama hi. Judahte'n Siamazih mite pen Judah minam kician hilo(sit-lo) ci'n mu-uh a hizieh in muda mama uh hi. Nuazui'te hunlai in Judah minam'te le Gentile minam'te kikal ah kideidan na kawm nasia mama hi. Tam bang minam kideidan na hang in Leitung galpi nina hun in Judah mi-600000 bang kithat in, meikuongpi manaw uh hi. Ih Kawlgam ah, Kazin le Kawlmi te kikal ah, kimuda na kawmdalpi khat na om ngai hi. Kazin'te khat in. “Vantung ah Kawl'te khat kamu leh kilekia vingveng vang in, meikuongpi pei zaw vawt van'g” ci sah hi. Tua bang a ih kibahlonate kideidan na aa ih neihlo ding kisam mama hi. Ei Zo mite pen khuo khat le khua khat ih haam zong kibanglo om thei lai hi. Khatvei ZBA aa General Secretary Rev.Kam Suon Mang kung ah, Lai siengtho na tei na uh ah, (Vai, vavui; ha, hla) ci kammalte koipen aa, a man zaw ci'n zah nasawm uoi? ka ci leh, “Ei Zo mi khat popo haam pen ei ma Zo'te haam hi ci'a ngaisut ding leh san ding ahi hi” a ci cieng hi sa mama ing. Tuabang aa ih san ciengin, Zosah, Zohang ci a, kikhenna kawmdalpi a phel mang ih hi hi. GZO min kiphuona, Panorama Hotel ah a kibawl in, Rev Dr Go Za Kham in “Common sence na nei bo un" ci'n ei vaihah hi. Pu Zo Suan te’n a taanzau thukhuol na i nei leh phung cin, namcin'te aa dingin thupha ih suoh ding hi. Nam neu lungsim nei khat in Nampi te bang ci huam thei ding a hei? Nampi lungsim a hi, Khris lungsim vom ciet bo vai.

Zo mikhat in Zo haam pen zumpi lo in, ih zah ding ahi hi. I haam in ih lungsim ei kinai sah hi. Nam itna zong kilang sah hi. Zo gegu Zo haam aa, haam theilote e leh? Tu aa mun ah, Zo mikhat in Zo haam ahaam theilo zieh in Zo hilo kici theilo leuleu hi. Haam pen kisin thei aa, nam hina pen kisin thei hi lo hi. Minamdang khat in Zo haam a siem zieh in, Zo minam kisuohsah theilo hi. Khatvei, Korea aa ih Zo mite in, khuado khat bawl uh aa, tua mun ah Rev. Khuppi in, "Zo haam ka siemlo zieh in Zo hisih teh, nei ci uh leh, i sisan en vai” a ci kammal pen san huai mama a, minam itna pen sisan hizaw hi. Zo haam aa, a haam thei lo, i Zo sisan a nei ih mipihte tawh ih kikal ah ei dal kikhenna kawmpi phel mang vai.

2. Khaw-kal sih vai.

Zo mite'n a pieng sah pa Pasien phawhlo aa, a piensahnate beh uong bawl, thupi sah zaw a, i op leh “a khaw kal” i hi ta hi. Zo mite Khris mi suoh ding, Zo gam Khris gam suohsah ding longal a thupi zaw dang omnawn lo hi. "Tua zata-a a lien hutdamna thu thudon lo-in om lei, bangci bangin i suohta thei ding ahei?..." (Heb. 2:3) Tu ni-in, hàm kibang, minam kibang, sisan kibang Zo mite leitung ah Pasien in namkhat in ei pieng sah hi. A hizong in khatvei kikhen na ang om dinghi. Tua kikhen na in khantawn kikhen na ahihi. Pasien innkuon suona in a kikhen ngai nawn lo ding nam khat suona ahi hi. Tu ni-in "Koi be koi phung na hei? Koi pawlpi na hei?" ci'a kidot na sang in,"Gup nga lam na ki cien tai mah?" ci'a kidoh na in thupi zaw a, khantawn hinna tawh kipawl zawhi. Zeisu sung ah pum khat sa khat suona la ciet bovai.