by L. Hranglien Songate
P. 1-2
ŢAWNG INŢHE DAN
Pathienin tawng dangdang a tawng a phal ang hrimin, ei thlatuhai lai Ţawng a ahung inthe tah a, thlatuhai hawrapa ‘R’ nei le neinaw an hung inţhe tah a. Ei umna ram le hmun izir ang peiin hieng anghin an hung inţhe tah a.
Ţawng hawrapa ‘R’ hmang po chu hienglai hi annih:- (1) Pawi (2) Ngawn (3) Halkha (4) Lusei (5) Ralte (6) Hmar (7) Lakher (8) Bawmzo (9) Lamkang (10) Chiru leh (11) Kom (12) Aimol (14) Langrawng etc annih.
Chun Ţawng hawrap a ‘R’ hmangnaw hai chu:- (1) Thado(Kuki) (2) Paite (3) Sukte (4) Thaute (5) Zo (6) Simte (7) Gangte (8) Vaiphei (9) Mangvung (10) Baite (11) Khuongsai. Haokip le Kipgen hi number 1na sunga ngai annih.
Chun, hienghi a hung nih a, Hrumsawm thawpo chu ‘ Pawi’ an tih a, chu umzie chu Sip or Bawk tienga sam intawin tina a nih. Chun, Tukbemsawm thawpo chu ‘Hmarh’ an ti a, chu umzie chu ‘hnung tienga sam intawm, tina anih, Hi hi ei thlatuhai laia ţawng le hnam inţhe dan ei hriet hmasatakna chu a nih. Hun le kumhai a hung inher liem pei a, kumza tam a hung liem hnungah hnam tumtum le chi tumtum in an hung insal ta anih. Kawlphai an hung lut kum 98 A.D vellai hin chu tulai anga hnam inţhe hi a la um nawh. Kawlphai an hung suok san a, Thangtlang le Lengtlang an hung chuongkailai hin tulaia hnam thlangpui deudeuhai hi hriet a ni chau anih.
PART I NA BUNG I
1. CHENGNA RAM
P.4
“ An saputdan, an khawsakdan le an ţong nei dana inthokin Mongolien hnam an ti laia pêng pakhat chu an ni ngei a ni ti an hriet thei. Hieng Tibet mi, Bhutan mi, Naga, Meitei leh Burma rama hnam dangdang chenghai ţong hi chîk taka khaikhin chun ieeangna tamtak a um a; chleiin, hun liem tah, hun sawt tak, iema ni hunah chun an lo um hmun kkhat ngei a ni ti an hriet thei. Hnam dang hienng Lusei, Pawi, Thaute, Sukte, Paite, Ralte, Thado, Lakher, Gangte, Vaiphei, Simte, Zo leh hnam dangdanghai leh lem hin chu ţong leh khawsak dan enin thlakhat suok vong nin an inlang a, an intumna kum tam ni ring a um nawh. Chêngna leilung inang nawleiin ţonghai chikte tên an hung danglam a, leidova insiemin, mani lle mani indo hlak an ni leiin an inzomna damte tên a hung intan a,; sorkar huoia an um hnungin sorkarin an inthuruol thei nawna ding le ro olsam taka an rêl khum theina dingin anni
P.5
karah zum leh zuor an hung intuo pek bok leiin hnam dang angin an hung insâl tawl ta meimei nin an lang. An inhnaih tawi êm leiin Britishhai khom khan ţhenngaina an hriet naw leiin a changing Chin ti dam, Kuki ti dam leh Mizo ti dam in an hming an inputtir meimei anih.
Chun, achunga hril tahai pawl lai hin ţong hmang dan thuah hawrop ‘R’ nei le nei naw an um nawjk a. Hawrop ‘R’ nei nawhai chu hieng Thado, Haukip, Sukte, Paite, Gangte, Vaiphei, Simte leh Zohai hi an nih. Chun, ‘R’ hawropa nei pawl lai khom ‘Ţ’ nei hai chu hieng Lusei, Hmar leh hnam ţhenkhat an nih.
‘HMAR’ ti hming hi ieng hun laia inthoka an put ţan amanih ti hriet an nawh. An hla hluihaia chun a hming hi hril a ni ngai naw a, amiruokchu tuta an chengna ramhai an hluo hnunga an hla phuoka ruok chu a hming hi voi tamtak sâm a nih. Sinlunga inthoka an hung suok in, Shanah an um a, chutaka inthoka an hung thlang tlâk hnung chen khomin an inkona tak chu ‘SINLUNG SUOK’ ti a ni hlak.
P.6
Hmar upahai ţobul thusim hrildan chun Hmar ti an hung ko ţanna chu Pawihai leh an inţhê lai hun nin an hril. Pawihai thlatu bul tak hi nau upa tak a na, a naupang laiin a tukhnungkhur an pan leiin a nû’n a sam a bâwk tieng an tom pek a, a pânnâ ahung dam nung chen khawm chun an tom lêt nuom ta naw leiin a thlahai chenin dan nghetah neiin bâwk tieng sam an intom pha a nih. Hun a hung sawt a, mi an hung pung a, bâwk tienga sam intom pawl leh hnung tienga sam intom pawl an hung inngei ta naw a. Paawi a hung suok tah a.
Hrumsawm (bâwk tienga intom) pawl po chu ‘Pawi’ tiin an kova, tuchen hin hmingin an hung nei sawngta a. Chun, Tukbemsawm(hnung tienga sam intom) pawl po chu pawihaiin an ţawngin ‘Hmarh tiin an mi ko ve a,. Hihin hma tienga sam intom lo, hnung tienga sam intom po chu a huop a nih. Amiruokchu, Tukbemsawm(Hmar) pawlhai lai khan inremnawna tamtak a hung suokta a. Pahnam indo chen dam a hung suok ta a.
P.7
Chu phing leh pahnam dangdanghai, hieng Lusei, Paite, Thado, Lakher, Sailo, Zo etc hai chun an pahnam hming an hung suklang ţanta a. Hmar ti la kol zing hai chuong Lusei lalhai, Sailo lalhai, umna bik deuva inthoka Hmar tienga um ruok chu an umna Hmar tieng izirin Hmarh a inthok ‘H’ peiin ‘Hmar’ ti a kovin an lo um ve ta a.
Hmarhai hi tuta Mizoram hi a hluo hmasatu tak hnamhai laia pakhat an nih. Amiruokchu, anni lai pahnam indo an hung ching dok leiin an inthuruol theita naw a, chuleiin, an umna hmuna inthokin Lusei lalhai leh Sailo lalhaiin an hung huot darta a nih.
Chuong a tlân darhai ţhenkhat chu Manipur an lut a, a ţhen tamtak chu Mizoramah maksanin an um bok. An indar nasat em leiin manin lal nei a, ke khat a ngir a hung harsa leiin mi tamtak chun lal dang an bêl. Chun, la neia khuo an siemna hmunah hai khawm mani pahnam chibing senga inkovin an khosata a nih. Chuonga lo um an ni leiin hming hranhranah ko an hung ni pha hiel a, Thadohai
P.9
tlang tieng peia lo um an ni hlak leiin Thadohai chun ‘KHAWTHLANG’ tiin an lo kova. Hmarhai khomin Thadohai chu an khaw chung peia um an ni leiin ‘KHAWCHUNG’ tiin an lo ko bok a nih.
Kum 1890 vela Tarmit Sap, Lt. Col. J. Shakespear in hieng lai ram vêl an zin lai khomin hieng laia Hmar mi chenghai chu pahnam hming tamtak a ziek a, amiruokchu a hriet dan a chieng naw em leiin chuong Hmar pahnamhai chu ‘Old Kuki’ ti hnuoiah indik lo takin a lo sie tawl meimei a nih.
Tripura, Cachar le North Cachar Hills ramhai zuona Hmar mi zu tlunghai Bengali le Kachari haiin hming dang an lo inputtir bawk a, chu an kona hming chu ‘Kuki’ ti a nih. Hi hi Bengalihai hming phuok a na, an ko ţanna le a umzie hriet an nawh. Bengali le Kachari mihaiin anni rawi, phai mi nilo, thingtlâng mihai an hrilna ţong, inhmusitna tieng pang kawka inkona nin an hril hlak. Lekha ziekna a an lang hmasakna taka hriet chu Bawlins-in Asiatic Researches(Vol.II-xii)
P.9
a 1792 kuma a lekha ziek “Cucis or Mountaineers of Tipra” ah a nih. Hieng lai hunah hin Bengali-hai chun thingtlâng mihai popo chu ‘Kuki’ tin an lo ko vong a, a hming put nuom ruok chu tukhom an um nawh. British sorkarin ram an hung lak a, sorkharna an hungsiem hnungin Bengali-hai kona hming ‘Kuki’ ti chu an hung hmang ve tah a, Bengali-hai zu paw hmasatuhai kha ‘Old Kuki’ an ta, chu hnunga Mizorama inthoka hung tlandarh, Thadohai le mi danghai kha ‘New Kuki’ tin an hung inbûk tah a nih.
Amiruokchu, khâng laia Hmar lo umhai khan ‘Old Kuki’ ti hming hi an lo put nuom naw hlê a ni zie chu J.W. Edgar 1871-72 a Vailien hmasa tak, Tipaimukh tunga hunghai laia an Civil Officer in April 3, 1872 a an zinna chanchin a ripawtna a chun hieng ang hin a lo ziek a nih. “Hi hming ‘Kuki’ ti hi Bengali haiin tlangmihai konaa an lo hmang hlak chu a na, amiruokchu tlangmihai tukhomin hi hming hi an pom noh. Kuki hnam tia ei ko tawl hlak hnam ni awm tak, hnam khat ni awm tak vong si, sungbing chi hranhrana insâl seng
P.10
an na, an renga inkona ding hnam hming tlanglawn ka hmu suok zo noh”. Hi hming hi Hmarhaiin an pom naw sasa, inpomluitir tumna le a hming hnuoia inkeikhawmna zonga innorluina leiin kum 1960-61 khan thisen suokna chen a tlung pha hiel a nih.
Hieng a hmaa hril tahai ang khin Hmarhai chu an umna ang pein mi danghaiin hnam hming dangdangin an lo ko hlak a nih. Amiruokchu, Manmasi thlaa insieng, Singlung inthoka hung thlang tla, thla khat bika inthoka pahnam tamtak le a kaupeng tamtak hung suokhai(Bung 3naa ziek hnam le a kaupeng) chu Hmar tiin an inko tah a nih.
Ţong thuah an umna izirin an danglam metmet. Hieng Biete ţong, Hrangkholh ţong, Sakechek ţong, Darlong ţong, ţonghai hi an hnaih zual bik a. Chun, Ţhiek ţong leh khoom hi ţong panga hai hi an inhnai bik bok. Hienghai hi Hmar ţong upa bik deuhai an nih. Hienghai naw khom hi ţong danglam metmet hieng Zote ţong, Leiri ţong leh a dangdang an um bok a.
P.11
Mi a tam lemin an hmang tak chu hi lekhabu zieknaa ţong hmang ‘KHAWSAK ŢONG’ a nih. Hi Khawsak Ţong hi hieng ţong hril ta sahai lakkhawm ţong tlanglawn a nih.
BUNG 2
CHENGNA BUL LE THLANG TLÂK DAN
SINLUNG
Sinlung hi Hmarhai hung suokna hmun nin an hril a, a umna hmun le ram hi khawlai taka um amanih ti chieng taka hriet an noh. Sinlunga inthoka an hung suok dan chanchin an hla ngeiah hmu theiin a um:
“Khaw Sinlungah kotsiel ang ka zuong suok a,
Mi le nêl lo tam e, Hriemi hraiah”
(a) China putar Chao-En ti hrildan:-
Kum 1938 in forest Rasi sin ka thawha, Burma le ramri a Dolthing en dingin
Forest Officer D.C Kath a rawiin forester Mr. Thangneilal hai leh thla ţau(March) ni 23 in Tamu ah kan chama, chu hmun chun kawl ţong
P.12
thiem Mr. Thangkholet Kuki a uma. Ama chun China ram thusim hre tak el putar a hmng Upla a um ti a mi hril a, kei chun, “Chaina ram thusim chu ka hriet nuom zawng tak anih. Nang kawl ţong I thiema mi va fe pui rawh” ka ta, ami fe pui ta a, thu ţhen khat kan hril zo chun ka hriet nuom thu chu kan don ta a. Ama chun, ‘In piengna khaw tieng am ana? In thlatu bultak tu am ana? A ta, ka piengna chu ‘SINLUNG’ a nih an ta.
Kan thlatu bul tak chu MANMASI an tih ka ta. Ama chun a hrilta a, “Ka tleirawl lai Mandaley ah lekha kân chûka China putar Chao-En Ti inah ka leng hlaka. Ama chun tienlai a China thusim tamtak a mi hril hlaka, Manmasi ti thu chu hieng ang hin a hril a nih. Hnam dang lam tak Manmasi in ti hai chu China ram hmar tienga inthok in an hung lut a. An danglama chu hieng hai hi a nih. Emulo Pathien an bieka, Maicham kil 4 nei an siem a, a chunga Ran thisen le Beiphit an the a. Ramhnuoi tieng ran te an in thla hlak. Hmun pakhat Aopatong (Aunatawng) ah khuo an siem a. An khuo siem chu an ţhuoitu(Hotu) Sunglung a hming chawiin
P.13
Silung an tih a, Silung chu tu chen hin China rama ala um a nih. Chun, chulai huna chun China Reng nunrawng tak el a hming Sheh-Huangti chun Kulh a seima mi tam tak a sor a, Nuhmei le naupang ch a tumin a sieh a, pasal a sor hai chu lung kulh sunga ân um tir a, an in rim em em leiin mi tam takin an thi phah a. Kulh a siem zo hma in China Reng Shit-Huangti khom chu 212 B.C in a thi ta a. Chuonga China Sorkar a chatlak lai tak chun, mi tam tak chu an in rel suok ta a; chu huna bok chun Manmasi in ti hai khom an zâm suok ve anih. Hieng hun hi kum 220 B.C vel anih, tiin a hril. Ming dynasty Mogols B.C 200 en rawh.
(b) Pu Rohauvung Hril dan:-
Pu Rohauvung hi N.C Hills Rotzawla um ana, kum 1924 February thla khan ama chu ka hmu a, kum 100 mi ana. Ama chun ţhang sari zet puhai thu hril dong sawng thei peia dam kan nih a ta. Chun, Lusei lal Vanhnuailiana leh ruoltlak kan nih a ti bok a. Chuong anga dam sawt a ni ti ka hriet in Ei ţobul thu tam tak kan dona. Sinlung thu chu hieng ang hin a hril a; Sinlung chu Lungkulh
P.14
a inhuon tlat ana.Mi tu khom suok thei loh na a nih. Ana kie chun khaw le a hung var a, mi tam tak hai chu an suok ta zungzung a, Eini Manmasi nau hai khom ei hung suok a thlang ram ei pan a, hun sawt rak lovah Himaloi ei tlung a, Songthu leh Songza hai unau in Khawlieppi ah khuo an sata. Eini rawi chu Khawlawi ah ei uma, chu hmuna chun Sûra hai Devanthang hai Sivanlal hai Devanngul hai hi an vang lai a nih. Kum tam tak hnungin Dimphai(Dimapur phai) an luta. Chutaka inthokin Nisuotieng an pana Shan ah an lut a nih’ ti in a hril a nih. Chun hi hmun ei umna hming chu “Khawloi chal” an tih.
Khuongzang putar Tongkai, Thado hril dan in, Pu Tongkai hi Lusei le indo vawi 2na laia Tuibuokphai in kap na a ţhang, mi huoi tak el ana, Ei ţobul thu ahriet dan chu hieng ang hi a nih:-
Sinlung or Kûl a inthoka ei hun gsuok lai hin Hmarhai pi le puhai le Thado hai pi le puhai chu Khawmangpi ah an um khawm a, chu hnungin Thado hai pu Songthu leh
P.15
Songza hai unau in Kholienpi ah khuo an siem a, Hmarhai pi le puhai chu tlâng sang tak bul, Khawlawi ah an um a, chu taka inthok chun sim sak pan in an fe nawka, Dimphai(Dimapur) a ni el thei an lût a, chu lai rama lo um hai chun, “Ar chuong anga lu vaw naw phawt chu that ding” an ti leiin Suongtunzo or Lungdingzo vah an umkhawm nawka, chu taka inthokin Nisuo tieng pan in an fe nawk peia. Thingtintlang an chuong kai a, ka pi leh puhai chu tlâng sipa an um a. “Nangni pi leh puhai chu tlâng bulah an um a; In pi leh puhai in tlâng sipa um hai chu khawchung hai” an ta, keini pi leh puhai in nangni pi leh puhai chu ‘khawthlang hai’ an tih a, chu hmun chu a nih khawchung ti leh ‘khawthlang’ ti hung um ţanna chu anih, hieng hun a hin kum za tam alo liemta a, Songthu thla a mi Doungel a inthokin ‘Thado’ ti hi ka put a nih, hieng huna Thado hai thuoitu chu Lalsuong ana, khawthlang(Hmar) hai thuoitu chu Zamadiei a nih tiin a mi hril a, kum 1953 October.
P.16
Zamdiei hi ţhisen phur suok tu hmasa tak ani leiin chu ţhi chu “Zamdie ţhi” an ti a nih. Hi ţhi hi kum 1890 hun lai chen khan m in an la dit a.
“Zamdiei ţhi a ţha ber e,
Sakatieng runral kawl a deng e;
Zamadiei” an ti hlak.
Mi tamtak ringdan chun Sinlung hi “PÛK’ lungkhâra sîn nin an hril. Chutak inthok chun hnam tamtak an hung suok a, Hmarhai khom hi an ţhang ve a nih. Hmarhai an hung suok chun mi tamtak, a lo suok tah an hang hmu chun khi a chunga hla khi an phuok nin an ring. Thado hnamhai le hnam dangdanghai khom hi an pi leh puhai thusim hril dan chun khur sunga inthoka hung suok nin an inhril. A ţhen ruok chun Sinlung ti hi China rama hmun pakhat hming nin an ring bok . Chu hmun chu râlin an hung rûn leiin Hmarhai hi an tlansieh a, an tlansietna hmun lampuiah chun mi tamtak lo tlansie ve an hmu leiin achunga hla khi a phuok a nih an ti bok.
P.17
A.D 8-na vela China lal rorelna huoia um pei lova hnam tamtak tlansiethai le inpem suokhai laia Tibet ram le Burma ram hung zuon pawlhai laia ţhangsa ve an ni ring a um. China rama Silung khi Sinlung an ti a ni el thei.
Sinlunga inthoka an hung suok hun le an hungna lampui hi hriet chieng ni naw sienkhom an dawi hla bul tak “Tiena Kachin lei, ka pu leilung Himaloi” tia an lo insam hlaka inthokin Tiber ram, Himalayas tlang ţhut hrûtin tuta Arunachal Pradesh an ti ram khi an hung tlung lai hin Sûra chu nuhmei nei a lo hun ta a, a nuhmei ding Misimhai(Mishmi) farnu, a hming Thairanchong an inneitir ti upahai thusim chun hrilin a um. Arunachal Pradesh vela Dimphai an luta, Dimphai a inthokin sim sak tieng an pan a, Thingtin tlang an kai a, Thingtin tlang a hin Thado hai chu tlângsîpa an um a, Hmarhai chu tlangbul kawn phei ah an um a, Thado hai chu Hmarhai in KHAWCHUNG hai an ti hlaka. Thado hai khom in Hmarhai chu KHAWTHLANG hai an ti hlak bok a, chuchu khawchung hnam le khawhthlang ti hnam um ţanna a nih. Hi thingtin tlanga inthokin Shan an lut a nih.
P.18
SHANA UM THU
Pipu thusim hril dan chun Hmarhai hi khaw dangdang zuona an hung pei lai chun an umna hmun ding an thieng le an thieng naw âisan peiin shan hi an hung lut a nih. Shan an hung lut hin an âisan ang dungzuiin umhmun khuor remchangin an hriet leiin an hung um tah a nih. An âisan dan chu: Ar khong(archal) hi an hang insuo a, archal chun hnuoi a thâi a, a khuong nghal chun umna hmun intheing dingah an ngai a,; amiruokchu archal chun hnuoi khom thâi lova a khuong nuom naw chun hmun inthieng lova an ngai a, a dangah an inson nawk pei hlak. Shan an hang tlung hin midang an lo cêng tah a, chuonghai le chun an indo ngei a nih ti an hla inthokin hriet thei a nih. Hihi hla serh bika an lo nei hiel chu anih:
“Ka pa lam tlâk a ţha’n dang,
Sinlung lam tlk a ţha’n dang,
Shan khuoah ţha phoin vâng,
Tuoichongin hranlu a tlunna;
Zainghawngah hranlu bah kan sal”
P.19
Hi hla umzie chu hieng ang hi a nih:-
Ka pa ngirhmun a ţhat dan ân dang a, Sinlung ngirhmun a ţhat dan ân dang. Shan khuo ah ei ţhat, ei vanglai ei pho langa, Tuoichong in râllu a tlunna, Mupui siek kem in, Rûl a rînga a ham hlum a, a râl chu a ţhat ti na a nih.
Hi hla hin do leh râla an hrat zie le Sinlung a an ngirhmun neka an insang lemzie hril na a nih.
Shana an um lai hin iengkimah Sinlunga an um laia nekin an hung changkâng lem tah a. Hnam dangin buchang chingna châng an la hriet naw laiin anni chun buchang an lo ching ta a, Bu ineina châng an hung hriet a; chun, râldona tieng dam hung hmasawnin an ral lâk luhai dâm ineina châng an hung hriet thar bok a. Khawthlang nun an hmang danhai khom hung insangin a khâma thil thaw dan le in sukhlim dan dâm an hung ching suok a. Chun, sakhuo hmangna ruoihai hieng LUNGLAK, SESUN, INCHONG le ruol dangdang khom Shana an um lai an thaw ţan a nih. BUTUKHUONGCHAWI khom hi, hi hmuna an ţan a nih.
P.20
Shan khuo hi inhoi an ti thei em em a; a ram leilung a tha boka, fak le dawn tieng pang khom an hieng inhnar em em. Nunghak leh tlangval nunhai khom hung insangin inepna hlahai khom tamtak an hung phuok suoka. Liendang, mi lungleng thei leh hla phuok thiem khom hi Shan khuoa pieng a nih. Nunghak le tlangval insaina hla tamtak a phuokhai le a thi hnunga an hung phuok sap peihai chu “Liensang hla” tiin an inbuk hiel a nih. Chun, nunghak hmeltha em em a an ihril, Zawltling khom hi Shana an um laia nunghak hmingthanga an nei a nih. A sam a sei em leiin tombasisawa zielthei a ni naw leiin a khim tah a, chutaka inthok chun samkhim hi an hung ching ţan a nih. An hlaah chun.
“Zawltlingi basam a tha,
A man khim ta e”
Tiin, Butukhuonglawm hla chenah an la sak hiel a nih. A chanchin Bung dangah chieng lema hmu thei anih. Chun, an tuikhur inhoi zie le intieng zie khom hla’n an phuok hiel a:
P.21
Shan khuo fiertui tha var indang,
Naufa’n hnamchem ang an chawi,
Thlangfa nghaknu lien inthang,
Lawnlei insa, khawmuol in a hawih”.
An ti a nih. Shan khuoa an um lai hin do leh rala khom duoi lo takin an dohai lakah hnena an chang a nih ti an hlaah chieng tak in an hmu theih:
“Shan khuo thlangfa pu tling tleng e,
I do thlunglu bak in salh,
Ka sawmfa thlawm, ka lami tha,
Thal khatin lan eih de ning”
Shana an um tawp tieng hin Thingpui intam tam nasatakin a tla a, mi tamtak chu Shan maksanin an inpem suok a, a then ruok chu Shan suoksan lo tamtak an la chambâng tho, chuchu hla’n an phuok a:
“Shan khuoah lenpur a tlakin,
Mi raza tlan thiera e;
Chung Pathienin Shan zuk siem e,
Shan khuo lung ang ngir na e” an tih.
P.22
SHAN LE KAWLPHAI INKAR
Shanah hun sawt tak an um hnung i a khuo inhoi ti hle hai sienkhom sa leh ral that a thangsuoa, pielral kai lo inbeisei mi an ni leiin ram thar le sa tamna hmun zongin an inpem suok nawk a. Chu bakah Shana an um tawp tienga ţam nasa taka a tlâk khan mi tamtak an tlan darh a, Kawlphai an hung lut a nih. Chuong lo fe hmasahai chu hung zuiin Kawlphai an hung lut a. Kawlphai an hung lut kum hin Luopuiin bûng a phun a, chu bûng chu Khampat kawlah khin tuchen hin a la ngir zing. Chuong lai chun Reng neiin an lo um hlak a, an rengpa hming chu Chonhmang a nih. Ama chun a ram
Sim tieng le hmar tieng le ram lailung optu dingin lal lien a thlang tawl a, sim tieng biel optu dingin Lersi, hmar tieng biel optu dingin Zingthlo, ram lailung optu dingin Luopui. Chu hla’n an phuok a.
“Sima Lersi, hmara Zingthlo,
Khawma laiah Luopui,
Luopuiin lenbuong a phun,
Thlanga puolrangin tlan e” tiin.
Hi mi pathum hai hi Kawlzawlah an thi a nih. Kawlphai an zuk lut kum nawk, a vasân lâk kum , bu an hau em em a, chu kum chun Sikpui lam an thaw a. Chu rama lo umhai chun an en nuom em em a, hieng ang hin hla’n an phuok a.
“Hnampui inpêm hi chu,
Nelvaia min lei ang hril che maw,
Nelvai khawzawlah,
Ei nun thlepuon ang lan thar rawi e”, tiin, Chonhmang chu hun iemani chen hnung ah thlang a tla nawk a. Amiruokchu a chunga lal hril tahai ruok khi chu an rawihau tamtak leh an la chambâng a, Luopui bûng phun ‘Âisânna Bûng’ an ti chu a ra hun chenin an la um anih. Hienglai hi kum 99 A.D vel ni ding a nih.
KAWLPHEI LE CHAMPHAI INKAR
Kawlphaia inthoka an Rengpa Chonhmang thlang tlak chu mi tamtakin an zui a, Thântlâng chuong kaiin Rûn dung an zui a, chuonga fe peiin Vanllaiphaiah hmun a khuor tah a. Ana chu ram ţhatna zuol ditna leiin thlang ram tieng an son pei a, Rapho(Rengdil) an tia khun an nghat a, dil dâm siemin um hmun a khuor nghet a.
Hieng lai huna hin Kawlphai a la chambanghai kha thlang ram panin an hung thla ve a. Thântlâng hung kaiin a ţhen chu Khawzim chenin an va um a, chuonghai chu Hrangchalhai an ni bik. A ţhen Zampui tlângah an um a chuonghai chu Tusinga rawi Faihriem hai an nih. Thântlâng velah hin a ţhen chu hun sawt tak an um a, a tam lem ruok chu Rûn dung zuiin Lentlâng an hung kai a, Champhai le thlang tieng ram ţha umna hmunah mani chichia khuo neiin an um a. Kawlphaia la chambânghai kha Mizoram hung lut nuhnung pawl lai tamtak an ţhang a, a ţhen ruok chu um songin hnam dang an bêl ta lem a nih.
MIZO= HMARHAI RENG CHANCHIN
Ei pi le puhai chun Reng ei nei ţanna chieng takin an mi hril thei nawh a, “Kawlphai ei hung lut in ei Rengpa chu Khampata ânj nghata a in kulh in ân huona, chu chu kawl Rengpa’n a hriet in palai a tirh a, ‘ka ram sunga Reng dang um thei nawnih, a um ţâl chun buoi a nuom ning a tih’ a ti leiin thlang ram a pan a, Vanlaiphaiah ân nghat a nih” ti bâk chu an hril thei naw a nih.
Chun “Rengpa hming chu Chonhmang a nih” an ti bok a, Vanlaiphai a hin hun ieng chen am a um ti khom an hriet naw boka, Vanlaiphaia inthokin thlang tieng ân tawl nawk a, Rapho an ti hmun a chun ân nghat a, dil dâm siemin a um a, Rapho chu tulai hin Rengdîl an ti tah, hi Rapho hmun a hin iemani chen a um a, chu hnungin Dâpram(Phairam) a lût tawm hin a chihai lallien (Reng) a a seim hai po kha a ko khawm a thutiem a nei puia, Reng Chonhmang chun a hril a, “Tuhin Dâpram ka lût ding ana, in kuomah sie ka dawl hlak ang khan la hung dawl zing ka ta, chun thu ţha ka hung hril ding leh Patdam le Bufai le satlin hung in tlan tir ka ta, thu sie a um leh thingthubong le Hmarcha hung in thou vêl ka tih” tiin. ( Hieng hun a hin lekha an la nei naw a nih. Chuonga thutiem an nei zo chun Reng lukawm (satoldier) an ti chu a pek chit a, Tusing Saivate chu Rangkachak thleng, a chung le a hnuoia bu fak theina rel chu a peka, Sesong bêl chun Lawipa Hrangchal chu Dârthirbu(Hrakawngbu) le Sakor a pek a, Sortuirakam Neilal chu Hûntung tangkaruo a siem a peka,Fieng puilal chu Mâilâng thleng le Dârkhuong a peka, Hrangkhol Reng demlukim chu Dârbu(dolpabu) le Sakor rang a pek a, Tanhril Saivate chu Rengpuong le Kêlsai ţhi a pek a.
Chun, Rengpa Chonhmang thi hnungin Reng dang an hung um ta a, sie dawl dingin vai mi 20 lai an hung a. Kha hma kum 10 dawl dingin an hung hlak ana, chulei chun khawsawk biel(Champhai biel) in an lo hriet thiem ta nawk a:-
Vai an hung vai an hung,
Rengpui thal hlawn vai an hung,
An ţong fâng ang hawi lo va,
Tapuong ang la khawng rei aw”
an ta tliem sirin an lo vuok a, chu lungsen chun Rengpuiin Takam(Chakma) vai a hung ruoi a, khawsak biel po po chu ahung sukdarh ta a, lalhai popo chu an man a, la danghai chu an in tlan thei vong a, Lungtau lal Haudar ruok chu an in tlan thei nawh, asan chu an bu petu vai bâu a lo sat thlak pek a, chu leiin an ţhuoi thlak a, a hung suokta naw a nih. Chonruong nuhmei hi a hmel a ţhat leiin Reng sipai hai chun an ţhuoi a, nisien khom a pasal Chonruong chu pa rem hre tak ana, sipai ruol chu a lo lekhela Rêl in tarkot(tlanpiel) a sûlhna hai chun an ţi ta em em a, an tlan sieh a. A nuhmei chu ahung ţhuoi kir nawk tah. Hieng hun hi kum zabi 16 lai a nih, November thla de lim nih.
P.41 Lungbova an um lai hin Lungtau haiin Dawnhai an zu dova, mi tamtak an zu that leiin chu an thatna ruom chu tuchen hin DAWN RUOM an la tih. Hi indonaa hin Dawnhai chu SAwnlenhaiin an thangpui leiin Lungtauhai khom chun Zotehai Lal, pasal tha, Hriler an fiel a, an do hron anih. Lungtauhai tienga pasal thahai chu Haudar, Darpuivung,Tomising leh Thluhrim an nih. Chuonga leido a va hnepui lei chun Zotap Hriler chun hieng hin hla a phuok a.
“Songate pa lal chunghnung ah,
Belzu zuong phur,
Zuo Lêr hi khuoi ang zuong hie;
Kan pui nin Zawlkhuon chungah,
Sekawl in thli, thangvan ang chunghnunga e” tiin.
Chun, mipuiin Dawnhai an va rûn hma khan Darpuivungin a khât chauvin a va rûn a, mi pakhat lu ahung hawn a, a farnu Thluchawndarin chuchu hla’n a phuok a.
Ka u ie, Darpuivunga, Dawn tlang va ţha,
Tuipui sen zelzul chungah hranlu i khai
tiin. Haudar chu Takam vai lienin an ţhuoi hmanga, a hung kir ta noh. A hmun ah chun Lienhak a hung inlal a, Lungbo a inthokin Neidon an kal a, Neidon ahin Lienhak chu a thi hnungin Infimatehai Fimlur chu lalin a um tah a. Ch taka inthok chun tuchen hin Infimate lalin an um pha tah a nih.
Hi Lungbova inthok hin Lungtauhai chu an um indarh tah a, a ţhen Neidona Keivom zovah an um a, Keivom tinn kovin an um tah anih. Keivom zova an um lai hin Bil an kam hlak a, chutaka chun sakei dum(vom) a del hlak leiin chu tlanga um po chu Keivom tin an hung ko tah a, tuchen hin an umna tlang chu Mizoramah Keivomzo ti’a ko a la ni zing. A ţhen chu thlang an tla a, Tamdil velah khun an um a, Tamdil lova an nei leiin an ni rawi chu tam râng tia ko an hung ni tah. Mihriematehai, Lungchuonghai le a dangdang khomin mani puolin tlâng an hluo ve. Pipu thusim hrildan chun hieng Lungchuonghai, Sielhnamhai, Pakhumatehai hi Neichîrh siel a philna hmuna an thilthaw ang peiin hming an put a nih. Ral vêng dinga lung chunga chuongpa kha Lungchuong an ta, an sephil vun hnama neia kha Sielhnam an ta, a vun khumtupa kha Pakhumate an ti bok.
Lungtauhai hin mani tuhai chunga HRINGTHA tlaikhat an fak hlak. Hringtha hi an nauhaiin mi nau dinga nau an va hringna tha sawl man a nih. Hringtha fa naw khom an um a, chuonghai chu Thiekhai fâk dan angin an fe. Hi Hringtha an fâkna hi an tuhai pasal taphot chungah chauh anih. Hringtha an fâk pha leh an tuhai chu an zawk a, lukawm le chem an pek bok hlak.
ZOTE HNAM p.5
1. Puseite 2. Chuonkhup 3. Salate(Saihmang 4. Hriler 5. Chawnghau 6. Chawngvar 7. Buonsuong 8. Chawngtuol 9. Darkhawlai 10. Tlangte 11. Parate 12. Hrangsote 13. Ngaiate {14. Siete, 15.Saite, 16. Chawnnel are Darlawng Zote
3. ZOTEHAI
Zotehai hi Tartenu le Tartepa nau Vanso thlaa hnam hnng suok hai chu an na. An khaw hluo phutna chu Hranthli leh Cherhring a nih. Lentlâng an hung chuong kai hnungin Lamlu an kai a, chuong lai an mi huoi chu Hriler a nih. Chutaka inthokin Hrangchalhaiin an Champhai an inthokpui a, chuchena inthok chun Zotehai le Hrangchalhai chu an inûnâu en ta a nih.Champhai vela an um lai hin Hriler,Chonghau le Chongvawr hai hi pasal tha an nih. Takam Vai an hung lien lai khom anni rawi hi lal na la ni zing.
Champhaia an um lai hin Zotehai hi mi ral hrât tak an nih. Lungtauhaiin Dawnhai an do ţum in Hriler, an pasal ţha chun a ţhangpui a, henna an chang a, Hrangchalhai le Rangtehai an indo khomin Zotehai ţhangpuina leiin hnenna an chang bok. Chuleichun, a nih Champhai an insempuina chu, Thiekhai le Lungtauhai leh hin pu hrui khat suok an nih.
Chun, Zotehai Sieriel(Pusie) a naupa chu a hming Neithâm a na, a nu chu Suontak(Vaiphei) hai farnu anih. Neithâm hming an putna san hieng ang hin an hrilh. Suontakhai farnu,chu Sierielin nau ân pâitîr a, a nau a hung pieng chun Suontakpa chun Sieriel chun nau hming sak dingin ân cha a. Sieriel chu lawm em em in Siel a kei a, puonpuok ding puonthle le an be tir ding ţhifang pahnih chawi in ân thok tah a. Suontakpa khuo a tlung tawm in Suontakpa khuoa nupui pakhat bâl chovin ‘Ieng dinga i khata hung am in na? Kan khuohaiin, ahung pha leh lo vaw zêk ei tih’ an ti che’ tiin a lo hlêm a, Sieriel chun taktak a sawn a, a Siel kei chu a thlung a, a puon chawi chu a kiah a zêl a, a ţhifang chu a siel ân be tirh a, a khuo tieng a kirsan nawk tah a. A nakie chun, Suontakpa chun Sieriel chu ân châ nawk a. Sieriel chun a ruolhai fielin a fe hmasaka a chawi ang bok kha chawiin a fe nawk tah a. A siel kei hmasaka a thlungna hmun a va tlung chun a Siel chu a ruhai chauh a lo um tah a, a lo ţawl borh e! ta leii chu hmun chu “Chaltolmuol” an bûk a. A nau hnei a va hmu chun Suantakpa kuomah, “ Ka nei popo ka sukthâmna an leiin a hming chu “Neithâm ni rawh se” a ta, chutaka inthok chun Neithâm a hung put a a nih.Neithâm chun nau pasal paruk a hung neia, an hung khawsa thei ta em em a. Amiruokchu an unauhai leh an hung inrem thei rak naw leiin a ţhenin an puhai(Zotehai) an pan bok a. Khautehai chun an lo siem tha hle leiin an kuomah an um zing tah a. Tuchen hin mi tamtak chu Vaiphei angin an insâl pha anih.
LAWITLANG NAMTE p.6
1. Hrangchal (a) Laiasung (b) Sielasung (c) Darasung (d) Tungte
(e) Khuoltu (f) Lawmte e and f are Darlawng Hrangchals
2. Sungte 3. Varte 4. Suomte 5. Tlawmte 6. Chawnsim(Tonsim)
4. LAWITLÂNG HRANGCHALHAI
Hrangchalhai hi Sûra thla an nih. An pu Hrangchal hi Burma rama an um laia Fahriemhai lalpa,Salawnkhar naunu Kungawrh neitu a ih. Kawlphaia an hung lutin, Zaizu a khin an lal Rundar rawi’n an um a, Hrangchal chu Khawhrênga leh Khawzimah ân lal a, Chutaka inthok chun Dawiârtlâng an kai a, Chuong hun lai chun an burip ta hle a nih, tih chu an hla ah hriet thei in an um.
A vate’n khuo ron fang e,
Khaw invol laiah,
Atmaw zawla inhrilh,
Khaw invol laia,
Zimtui khawmuol, Dawiârtlâng hoiha in hrilh.
Champhai an hung lut hnung hin Champhai biel popo optu dinga an lal chu Zamthatvung Lawipa(Hrangchal) a nih. Champhaiah chuong lai chun Analhai an lo um a, Hrangchalhaiin an hlu dok chau ni lovin hnam khat lem chu an that chimit vong leiin Anal hai hnam chi thum ni hlak kha Masum le Muolchal chi chau an um pha tah nin an hril. Chun, an kawla Rangte umhai leh an Indo bok a. Chu an indonaa chun Zotehai lal Hrilerin(Hilegin) a thangpui a, hnêna an chang leiin Champhai zawl an insempui a, Hrangchal leh Zotehai an inlaibung en pha bok a nih. Hieng hun lai hi anih. Hrangchal hnam siper hming tumtuom a hung suok ţanna chu.
Upahai hril dan chun Lawipa Zamthatvung an chong ţumin an ruoi kîl dan ding thuah Vartepa a lung a awi nawh a. Chuleiin a zan a zanin a nauhai Varkil le Chonthang chu Lamzânghai khuoah an lut a. Nisienkhom a upa Varkil chu a unauhai kuomtieng Champhaia bok a kir nawk a, Chonthang ruok chu a nuhmei a nauhai leh Lamzâng khuoah chun an um song tah a. Tuchen hin Chonthang thla hai chu Paite lal an la um zing.
Zaizu a an um laiin lungvâr an biek a, mi dang hung ţhang ve an phal naw leiin thal le phelpuiin an veng hlak a, chuchu hla’n an phuok nghe nghe e:
“Kan hranglung biek,
Korsaiin ka phal a nawh,
Siel phaw vom leh phelruo,
Chongthumah kan san”
an ti hlak. Lungtauhai le anni chauh hi lungvâr bie hlak nin an lang; mi dang hin chu an biek ti thu hriet an noh.
Hrangchalhai hi an khât tawkin mi hrât khawkhêng le mi hming inthang an nei rop hlak, Lawipa thi hnungin Chongthakhum(Chon lum tin a pan ko duotna’n a hmang hlak) chu mi hrât hmingthang tak ahung na, khawthlang mi hrât, Demrlukim khom inbuonin a zu tukdolh a nih. Chuong lai vel bok chun Lurpawng chu mi hrât hmingthang a kai ve a, thlahai chu Pachhûnga, Aizawl mi hausahai an nih. Lurpawng hnunga kuom mi hrât hmingthang Khairum le Laivung an hung suok nawk a, kum 1880 vel lai kha an vanglai a nih.
