I NAM LEH I HAM

Thulâimu (Abstract): “Ke’n ka hi le Vantung ka tun cieng, Pasien a kumtawn a phatna ka nei cieng ZOHÂM ma zang lâi vang” chi in tami thului pumpi deina a tâhlang hi. Laigieltu in hâm leh pâu khenkhat niemkiet thei a, hinanleh mangthang gige lou u’hi, achi hi. Tua ma bangin, Zokam zong tulâi nam dang leh hâm dang lienzawte’n liekhukhum thei a, Zokampâu nelsie leh mangngil zong mi om thei tham hi. Tam bang mite adi’n Zokam pen a shi bang a tuotthei ahia, hinanleh mi khenkhat a di’n Zokam pen hing gige di’a, “Vantung dong a zang ut” mi om veve hi. Hâm leh pâu kepbit mai hilou in, puophat zêl ngâi hi. Tualeh khangthu-tuonthu cheptê(teptê) leh kepbitna mun (archives) poimaw a, Zokam a, kisun pawlpi laithotte, thukizahnate, reportte, leh adg.adg., kepbitna di’n “Archives” hoitah nei dîng pen minam hâm-le-pâu kepbitna di’n kiphamaw hi.
Thuchabi (Key words): Zo mite, Pyu minam, Khamtung Gam, Khangthu Tuonthu, Muolsuong.

“ Suona dîng mun kitêl theilou, shina dîng mun kitêlthei” a ci bang un Zo i hi dîng i têl sih u’a,i hâm uh zong i têl tuon sih uhhi. Zo i hi ziehun Zohâm i zang u’hi. Ahi’âng, Zo hinapia Zohâm azang lou ahâm theilou tampi om a, a’ng tam sêmsêm lâi dîng hi. Ahângte anei ah ang guol vang. Mi ci tawm, minam mêng tampi khat minam golte kawmkâl ah kâipi suawngte(hakâi suawng kawmkâl a omte ci nopna hi a, tuabang hakâite gol theilou in phêngphanât hi) bangin om u’hi. Bangza’n tawm in nam mêng ta u’le a hâm, anam uh mangthang lou dîng hi. Ahi’âng, amanthan theina nawn lou dîng bangin a manthanna dîng uh zong lampi omthei kha dîng hi. Sim zom le ci’n thei vateh.
Kawlgam tângthu athei leh Kawlgam a, khangte’n Pyu minam thu i za ngai dîng u’hi. Amaute Kawlgam ah mi khangtou masa,mi khophawh masate hiin, alâi aham uh toh na om ngai hituawh hi. Ahi’ang tu’n amaute kimu nawnlou, a lâi uh kisin nawnlou,kizangta lou hi. Pyu mite Zo mite bang hileh tuadân in a hâm,a ngaina,a lâi uh mangthang lou dîng hi. Aziehpên, Zo mite bangin Pyu minamte’n khangthu simna, leh cieptena(teptêna) muolsuong(muawlsuawng) etc a na nei lou u’hi. Tângthu tuonthu ciemtê lou sûtlou uh hi dîng hi.

COLONIZATION LEH MINAM
AD 1500 kîm pawl in Spainte’n Lâi Siengthou leh thâuvui,thâutang zang in Philippines gam a na colonized (na uh,na huom,na luokhum) u’hi. Kum 450 A.D, banga sawt zou ciengin Japan te’n na uh kia in, a sawtlou in USAte’n na uh kia u’hi. Hun tomnou khat sung ahihângin USAte uh na ziehin Philippines mi “Filipino” te ngaina: ngaisut, lâi, hâm, nai-ngan-yi (politiks), pilna siemna ah etc, Americate dân tampi tah a zangta u’hi. Ahâng gênda vai.
Kum 500 A.D.,phiel bang Spainte’n ana uh ziehun tunidong cieng aminte uh Spainte min vive (eg. Lopez, Jose, Jesus, ‘J’ pen ‘H’ awsuo in Hesus in kisim) hi’n, ahi’âng, teng khat teng ni a kihal têi hâng, a hâm uh Spain hâm hilou Filipino hâm ‘Tagalog’ a zang u’hi. Filipinote’n colonization ziehin kumsawtpi hamsatna a thuoh hâng un, a minam,a hâm uh mansuo lou u’hi.
Aziehpên, lâisim, lâisiemte’n, a ngaina uh na ciemtê, na ât uha, apu apate un zong khangthu tuonthu, a ngainate uh na sun un, tuaciin, a hâm, a nam uh na kêmthei u’hi.
Kawlgam a, om Pyu mite bangin a lâi, a nam, a ngainate uh ciemtê lou, sût lou hi u’leh Filipinote zong mangthang zou phielta dîng u’hi. Aziehpên, Filipinote minam dangte khut sung leh uhna sunga om hi nalâi hi.
GLOBALIZATION LEH MI NAM
Globalization in sum nei, zânei ‘power & authority’ neite hauna leh thuneina akipsah sêmsêm a khansah sêmsêm hângin minam mêng leh mizawngte dîngin phattuomna tampi pelou hi. Globalization ziehin a sie tampi tah, a om hângin a hoina zong, a om sâm a, tuate minam tawmte dîngin zong, a sim cing veve hi. Globalization ziehin a pieng tampi a om sungpan ah, munkhat pan, munkhat lâlna(migration) thu gên vâi.
Globalization ziehin munkhat pan munkhat lâlna, gamkhat pan gamkhat lâlna ‘Domestic or Internal & International migration’ khang hi. Kawlgam ah, Khamtung pan in Yangon leh adang khopite ah Zo mite tampi tah, kumsiel in lâal(migrate) u’hi. Tua banga, a lâlte’n a tênna mun a, kizang hâm “ Kawl hâm” sâng, zum, zee ‘bazaar’ etc te ah zah lou uh phamaw a, tua ziehin amau hâm: Zo, Tedim, Thado, Siyang, Hakha, Falam etc hâmte, a inn sung beh u’ah kizang tabou uhhi. Akhawhpên leh a poipên in, nu leh pa tampi tahin, a inn sung nangawn u’ah a tate amau hâm toh houpita lou u’hi. Zo te deudeu uong(uawng) mama u’hi. Apienna khuo Muizâng, Lamthang, Lungtah, Gamngâi, Gêlzâng, Bumzâng, Khodâi etc, lahpan Tedim,Tonzâng ah lâl in, kumsawm bang, a sawt zou ciengin a tate un Zohâm thei nawnlou, hâmthei nawnlou tazen! A inn sung u’ah Tedim hâm kizang tazen hi’ei ! Liang aw ei! . Pawlkhatte’n Zo a hina nangawn uh zumpi ta valong! Mawk zawzen phial aw!
Khamtung gam a, têng Zo mite beh lâl hilou in leitung mun tuomtuom pan minam tampi tah gamdang ah kumsiel in “lou nouna leh tuidam zâng” sui in kilâl hi. Tua bang mite’n a tuntun na u’ah a hâm, a ngaina leh a nam uh hânciem tah a, a kep sih uha, a sin sih uh leh, a zekâi pên a, khang thumnate’n a hâm,a ngaina, a lâite uh thei nawnlou dîng u’hi. A’ng piengthei dîng gênna hilou in, tumama a, pieng thu ahi.
Rev. Dr. Stephen Hre Kio, Hakha mi, Kawlgam a khang, United Bible Society ah kum tampi sêm in Guam, USA ah kumsawt simsim a omta hi. A innvengte, a mêltheite, Hakha ci gênthada, Kawlmi zong om lou a, a tate minam dang kawmkâl ah khangtou u’hi. Tuaziehin, “ ka inn sung u’ah ahithei bangin Hakha hâm zahdîng ka hânciem uha, adeudeu in nipi khat in, ni khat hâmdang zang lou in Hakha hâm beh zahdîng dân ‘rule’ ka nei u’a, tuaziehin, ka tate’n Hakha hâm thei hi” ci ngai hi. Tuaziehin, Kawlgam Vâigam pan “lou nouna leh tuidam zâng” sui a, lalte’n limtah leh hânciem tah, kicientah ma a, i ngaina, i lâite, i sin i kep sih uh leh, khang thumnate’n i ngaina, i hâmte thei nawnlou dîng u’a, a tunna gammi suoh ding a, hânciem hâng un, Identity Card beh nga dîngin, mundang gamdang pan a, pêmta leh lâl a hina uh a tunna gammite’n mangngil ngai lou dîng u’a, mi bawl lou bân ah, simmawna ci tuomtuom leh etngiemna ci tuomtuom thuoh lâi dîng u’hi.
Upmaw thugên hilou a, a zalên pên leh a suohta pên gam a, kigên USA a, tung Asiante leh Africante’n tumama in,kumpi zum, nasepna zum leh company leh sâng lah ah, nisim in a thuoh uhhi.
Tuaziehin, globalization zieha hi’n zong, “lou nouna leh tuidam zâng” suina zieha pêmtatna leh lâlna ang tam sêmsêm leh tu zou kum 150 pawl cieng i hâm a zang mi a’ng tawm sêmsêm dînga, ahi’âng mangthang tuon lou dîng hi.

HÂM KIZAWITAWN ‘ KI NÂI’ PAWL KHAT
Leitung minam tampi tahin, ‘father’= pa i ci ciet uha, Zo mi Roman Catholic pawlpite’n pên Topa or topa ci uha, ‘pa’ ci veve sâm u’hi. Akhietna akibah bân ah, a awsuo zong kibang hi. Lungluthuoi. Kawlgam leh Indiagam a, têng khamtungmi ‘singtângmite’n’ ‘noun’ ‘adverb’ or ‘adjective’ a kibang in in i zang u’hi. Gêntêna’n: inn, lou, voh, thâu, hoi, sia, sie, san, sa, etc. Tamte ziehin lungpi cing khâi ciet in, kithukhat zou dîng uh hilei, Khamtung ‘singtângmite’ hâm pên zah ngiem dîng hâm ‘common language’ in bawlthei nadîng lampi om kha dîng hi.
Ahi’âng,kammal kitâng i nei hâng un, a vehpi’n(a unpi’n), kibang siengta cina hilou a, tua i kibah louna tawmnou khat in, kum bangza ei, khat eima hâm ciet: Zo, Tedim, Thado, Siyang, Hakha, Falam etc, i zang u’hi. Bangtan zang lâi dîng koima tungah akinga sih a,nangma tungah kinga ahi. Ke’n ka hi leh, Vantung ka tun cieng, Pasien a, kumtawn aphatna ka nei cieng ZOHÂM ma zang lâi vang!. Mi pawlkhat in a hâm uh, ang zang nawnta sih dîng u’a, ahi’âng khenkhat in ang cîng, ang kêm, ang puo in, ang zang siem mama dîng u’hi. A hâm a zah uh, ang ângtang lâi dîng u’hi. Kum bang hunlâi ei, khat in Kawl gam “Myanmar” a kizang Pyu hâm tu’n a kizahtâhlou, a minam nangawn a kimuthei tâhlou hângin, tuhun 21st Century ah minam khat, hâm khat mawh dîng hi. Aziehpên Pyute hunlâi bangin tulai minamte’n a minam ‘thu’ ciemtê lou, kêm lou,zang lou in a om sih u’hi.
Zo mite deudeu adîngin patâu a huoi lou zie! Bangzieh lah? I khangthu i tuonthu uh tampi khat toh, i sûtthei u’a, cieptêna zong i nei u’hi. I hâm uh toh Lai Siengthou, Labute i nei u’a, tangthu tuont te nei in, tuate ‘i khuo nangawn u’ah’, cieptêna(teptêna) nei ci lei, minam gol leh minam tam, a khangtoute’n cieptêna neita valeh, mâven! Tuaziehin bangzieha, tuate hâm tuhun 21st Century hun ah mawh man nawn dîng lah?
LÂI SIENGTHOU LEH HÂM
Hebrew hâm toh Pasien kammal ‘Lâi Siengthou’ na kigiel masa hi. Ahâng tampi , a om dîngte lah ah, khat gên lei, Hebrew ‘Hebia’ hâm toh Lâi Siengthou a na ki-ât hunlâi in, Hebia mite za a khangtou, minam dang omlou a, amauh hâm minamdangte’n zong thei u’hi. Kum bangza e, zaw khat cieng Lâi Siengthou Greek hâm toh kitei kia hi. Ahâng dîng lah ah, khatbêh ma gên lei, Greekte khantou hunlâitah in,amau banga khangtou, vângnei, thunei minam dang na omlou a, tuaziehin, pilna, siemna, sinna, sumsuina, nai-ngan-yi (politiks) etc, te gênna dîngin Greek hâm mi nam bup ci phiel in, na thei hituoh hi. Topa Jesu’n Aramic hâm toh thu a nagên vângin Greek lâi toh na kiciemtê hi. Tuazou kum bangza zou ciengin, Mânghâm(English) toh King James Lai Siengthou ang kiteikia(kisunkia) a, tuahun Englandte khantou dân leh thuneidân i sim ciet u’a, i thei ciet dîng un zong ka um hi.
Lâi Siengthou sângnaupang leh shiete ci, sim lou minamdangte’n Hebia hâm leh Greek hâm toh Lâi Siengthou, a sim tâh lou, a et tâh lou hângin Hebia hâm leh Greek hâm mangthang nâi tuom tuon lou hi. Nidang za in,minam dangte’n zangta lou, theitalou cina beh ahi. Amau hâm ahi ziehin, a gam a, omte’n a zah beh tham lou, mundang a omte’n zong tudong cieng ma a hâm uh zangin a ngaina uh mansuo tuom tuon lou u’hi.
Hunkhat lâi in, Tedim kuol a, têng minam bup: Zo, Thado, Tedim, Siyang etc te adîngin Tedim hâm toh Lâi Siangtho na kitei a, tu’n Zo, Thado leh Sizângte’n zong amauh hâm ciet toh Lâi Siengthou a nei tâh hâng un Tedim hâm mangthang dehsuawi lou hi. Tualâi innpipa hâm ‘Teizang’ hâm lien toh Lai Siang Tho a na kitei lou hângin innpipa hâm toh a kinâipen leh a kizawitawn pen Tedim hâm toh Lai Siang Tho a na kitei pên Pasien gêlna khat om dîng hi.
Bang toh kibang e, i ci leh, Khamtung gam Zo mite’n Dawi biehna leh pupa ngaina biehna, pâina nuasie in, Pasien a bieh na dîngun Pu. Pau Cin Hau innpite tapa khat in, a na gên pên Pasien gêlna gol mama khat hi. Innpite sungpan a na hilou a, minam dang ; Zo, Thado, Siyang, etc,te sungpan khat in, a na gên meimou pouma taleh, pen amapa pen nuomtuol kituonsah hetlou dîng hiven maw!
PASIEN in, A kammal leh A thu mi nam mêng, mite theiphâhlou leh phawhloute nangawn in, a theithei, a zâh thei nadîng leh leitung bup ah AMA thu a kizelthei nadîngin minam khat hâm a na zang hi, ci ka um hi. Tua, a zah kam leh hâm, lâite tua hunlâi in, a mun a muol ah, a kilimzahte nahi, hamtang hi.


THUKHUPNA
Na hâm, na kam mang ngai nawnlou dînga, hinanleh, nang leh na innkuonte’n na zah sih a, na thei sih leh, nou'a dîngin a mangthang toh ang kibang dîng hi. Mi pawlkhat in Vântung a tun ciengun,a kumtawn a Pasien phatna a nei ciengun a hâm uh ang zang dîng uhhi. Nang leh na innkuonpite’n bang hâm na zang dîng vuoi?


Laigielpa:
Hang Do Lien(2004)
M.Div;Th.M (Religious Studies, thesis)South East Graduate School of Theology,Philippines,
Th.M (Christian Ethics, candidate),Youngnam Theological College & Seminary, Republic of Korea.