Paite Lai Gelhdan

Source: http://zogam.com/

By V L Mangzou

Kum tamkuamtak i na buaipih uh Paite Lai Gelhdan (Diktak) tuni tan in adikpen theihbut ahi naikei. Tunai deuh in awlmohtu leh hiai lampang a theihna ana hau mi bangzah hiamte’n dik asakdan uh newspaper/magazine-te ah ahon gelh uhi. Pu Chinzam Tawmbing tuh Paite-te’ lak a laigelhzia thei leh siam mahmah, English-Paite Dictionary suanhuai mahmah khat ana bawlkhia ahi. (Ka lawmpa) Eugene H. Chinzahao le Jesu bang in amel in simmoh-huai mahleh, Modern Paite Grammarian thupi mahmah khat ahi. Pu Pauzagin Tonsing, Kimbawi’ Pa leh Pu M. Vumhaute i chih chiang in athugelh uh quality nei mahmah ngen ahi uhi. Amaute toh teh in kei tuh ‘ak-zatnih nuailam’ ka hi a platform khat a kikumkhom a kisel/kinial ding in ka ngap teuhkei. Hitamahleh, Paite-te’ lak a lai mawkgelh-gelh khat ka hihsamna ah ka ngaihdan tamsim ka kum ut zek hi.
C leh Ch:

Buaipih ngai hetlou, lah, i buaipih mahmah uh tuh C leh Ch zatdan ahi. Buaipih ding a-omkei. Paite pau a thu i gelh leh Ch zat di ahimai! Apoi mahmah tuh Paite Literature Society (PLS) in abawl Board of Secondary Education, Manipur nuai a Class – IX apat atunglam student te’n Major Indian Language (MIL) Paite subject a asin ding uh Zoulai Gelhdan Bu a C leh Ch kibang (alike) dan a ahon sinsak mawk uh ahi. C ahon zatna ziak uh tuh ‘I lai leh pau akhan semsemna ding a Kawlgam leh India a i lai leh pau lam vaisaite’ deihna bang in’ chih ahi.

Kawlgam lam a om (Teddim Chin) te’n Lai Gelhdan Paizia aneikhin ua, Ch azang ngeikei himhim (ding) uh. Huaiziak in, amau’ mitmei veng a (?) Paite pau/lai i gelh chiang a C va zatna ding thu a-omkei. Amau C leh Ch ah abuaikei uh. Bangchi zongteng in C zang mahle uh alamkhiak/agenkhiak chiang un Ch in aging veve. ‘Ciampel kei ni’ chi in gelh mahle uh ‘Chiampel kei ni’ chi in alamkhia ua, ‘Siampel kei ni’ achi tuankei uh. Ei’ adi’n bel C vuak zat abuaihuai a, adik theikei rengreng. I paukhiak zaw thutuam ahilai, i gelhdan ah i lai naktak in aki-nga. Teddim pau sim daidai in gelh mahle’ng Ch i zat leh Paite pau ahimai. Dapzar pau in gelh le’ng le C vuak i zat in chu Paite pau ahikei!

J leh Z:

Paite lai i gelh chiang in J zat angaikei, aginneem, ginkhauh, ginsang, ginniam, gintom leh ginsau ah Z azattheih vek chih tuh Zoulai Gelhdan Bu leh mi khenkhatte’ pomdan/zuihdan ahi. Adik thou. Hiai J tuh Pu EHC in ahon patkhiak dan a koih pawl om hile kilawm mawk hi. Huchi ahi tuankei. J le i alphabet (a aw b ch…) a omthou ahihman in zattuak i sakna ah zang le bang a poi, adiak in simkhelhtheih ahihna mun a i simkhelhlouhna di’n. ‘Ka Sir un hon zep’ chih tuh simkhelh vuallouh a chiang ahi. Hinapi in, adiak in khangthak lamte’n ‘ka Sir un (alenuai ah) hon zep (thinthen)’ chi in simkhial teitei thei uhi. Huaiziak in ‘ka Sir un hon jep’ chi in gelh le kisimkhial theilou hi. I pau a thumal kibang azatna tuam atam ziak in tua thumalte’ nung leh ma a thute apat agennop theihtheih sawm ding ahi. Etsakna – zang (penis), zang (straight), zang (use), zang (light), zang (loss), zang (plain). Hiaite’ lak ah zang (plain) pen simkhelh ahihlouhna di’n jang chi in gelh le bang a poi? I ut leh double vowel (zaang) chi in gelh le le poi bel hilou.

Aw leh O:

Paite pau ka gelh chiang a buaihuai ka sak mahmah tuh aw leh o ahi. Asauginna a aw zat ding atomginna a o zat ding chih tuh zuihdan tangpi ahi a, Zoulai Gelhdan Bu in le asinsakdan ahi. Himahleh, kei’ Paite awphoi leh midangte’ Paite awphoi akibatlouh ziak ahi peuhmah ding a newspaper/magazine a thu ka gelh chiang in ka zatdan peuh ahon proof read sak uh abang hi. Poimoh/pawimoh/poimawh/pawimawh, khawmpi/khompi, khong/khawng – bangchibang teng in gelh mahle agen-ut uh kibang hiveh.

O leh Ou:

Paite-te’n lai (alphabet) leh agindan i neih masakpen uh 1903 kum ahi akichi. Bangteng hileh Teddim leh Lusheite’n ei’ sang a laimal ana nei masazaw ahihman un Paite laimal hon bawlsaktute’n amau (Teddim/Lushei) te’ a dungzui a hon na bawlsak uh hi di’n ka gingta hi. Huan, i mi masate leh upa lam deuhte’n Lushei laibu ngen ana zang ahihman un tuni tan in thu agelh chiang un o tuh ou a ging di’n gelh uhi. Paite laimal leh agindan diktak in bel o tuh ou a agin ding hikha inteh. Himahleh, Paite-te’ lak a 99% in o tuh aw a gingsak a apoimohna a ou mah zang i hihman in kum 100 paisa a ana kibawl pen, dik or diklou, va ‘sumkuang chiangpeh’ hoihpen ding adiam? I pu-pa’ ngeina ahi, kepbit ding ahi i chih uh Paite Ngeina tuamtuamte le tulai hun toh kituak a bawllem (theih) hunkhop om ahihman in Paite Lai – a aw b ch …… ah o zoh in ou behlap in alphabet 25 nei maile bang a poi?

Paite Pau:

Kei tuh ka original pau Paite-Dapzar pau ahi. Khatvei Mimbung a ka va zin leh ‘na pau le amak guhguh tel’ hon na chi uhi. Ka dapzar pau adik zou nawnkei, Paite pau dang toh akipolh vek, ada gai chihna ahi. Khobing/Vengbing in paudan tuam chiat i nei uh, himahleh, tu-chiang in bel mahni original Paite pau chiik lua a-omthei nawn taktak kei. Huaiziak in i pau chiang, thu i gen chiang leh lai i gelh chiang in i zat ngeilouh paukamte zatkhaknak in a-omsek. Tua ahihman in, ahang bel, tuh, zong chihte khawng ka pau chiang a ka zat ngeilouh himahle uh, lai ka gelh chiang in bel ka zang khanak. Huai tuh kholak pau (colloquial language) hi mawklou in Paite pau hauhsakna hi in ka koih mai (Ch a pawimohna mun a ka zat nak leh). Huchibang kal ah Paite Laisiangthou Bu (2004) tuh ‘Paite pau ahikei, Teddim pau lamlam asuak’ chi in soisel aloh mahmah. Himahleh, ke’n bel agelhdan dik ahihman in Paite pau ahihlouhna om in ka thei tuankei. A awlmoh-huaizaw tuh tulai khangthakte’ pau zatdan ahi. Hon zatna ding ah hong (hong pai dih/hon pai dih) peuh zang uh a, huchibang mah in – kon (ka hon/k’on) zatna ding ah kong, non (n’on/na hon) zatna ding ah (nong) leh adangdang. Paite Lai Gelhdan dik i neihkin kei ua leh hiaite tuh Paite Pau Dik hong suak maimah ding bang hi.

Deihdan:

A awlmoh mi 4/5 te’n dik/diklou chi in kisel, kinial in kinakloh hial in Paite hihlouhna, Jesu nung zuihlouhna, tatlekna, diktatlouhna, Laisiangthou pialsanna, Setan’ vai kichituah toihtoih mahle’ng, tu-le-tu dinmun in bel kongrou asu vakkei. Ei’ khang chiang ah zaw bawldik ahaksa ta. Huaiziak in, tunung kum 10/20 a khangthakte’n Paite Pau/Lai Geldan Diktak ahon neihtheihna ding un tuh tulel a sinlaite’ subject tawi, Zoulai Gelhdan Bu kintak a sutthak a Paite Lai Gelhdan Bu a khek ding ahi. MIL Paite subject a Paite pau diklou (Zoulai Gelhdan Bu) i kitawisak sung teng Paite Lai Gelhdan dik ngeilou ding hi. Tuabang kal ah Paite pau, Zou pau, Simte pau, Vaiphei pau, Teddim Chin leh adangdang a-om a, Manipur (India) ah recognized tribe tuamchiat i hi ua, mahni pau a MIL subject neichiat i hi uhi. Hiai Zomi a kikhaikhom teng in Zoulai Gelhdan kibang zatkhawm ding chih ahih vanglak kei a, mahni tribe chiat a Lai Gelhdan i neih thouthou (ding) leh MIL Paite subject a tawi ding Paite Lai Gelhdan Bu i neih kin uh kiphamoh hi.