NÂNTAL leh NEINO by Philip Thanglienmâng

I) NÂNTAL,NEINO LA DÎNGA KICHIELNA leh A HÂT A LAHNA
Asun a zân nâu bang kap luonhli li bang ching e
‘Ka vondei lênmuol khup langam a opleh;
Ngatûh lulvoh tuolthapieh vâng e,
Tângmansî pheh gol dim toh zalui,
Zubêl sawm toh mêsah vâng aw e,
Vonnu lie khangthei bang lou vânin,
Zuopa gounei lam kuom bang luo va!

Atun vângkhuo tângguol zatam mal bang kou e,
Lumsiel vânlai zawl ah lehtou u’aw chi e,
Lumsiel tuollei tuongtun mateng bawl in aw;
Tongsu saba lulvoh thâu nejou aw e,
Tongsu sielki ningzu dim dawnjou aw e,
Tângmansî bêl aletdim nejou aw e

Lênmuol jamvâu ngâthun thalpi’n kâptan aw,
Sâumâng dung,sâumâng vâi kân khat jou aw e,
Sâulim dawnvum,dawnvum sâulim sângkhup aw e,
Sumpi tûmkêh,suhtai sagi palsan aw chi e.

Atun chinthu lêl tângguol’n pal bang nangla,
Nântal aninu hiengkawm khotuol tâm e,
Nâudei Nântal in pal bang nangjou va e,
Mal bang kou u’aw,kou u’aw aninu’n chi e.

Nântal zeitha hât e aw, mung bang khau e,
Thalpi kâpsiem e,teipi khawsiem e aw,
Nounei ann bang ît zâl zeitha zûn panta e,
Amun zâng a,alumsiel lehtoutou e.

Avânzawl a, alumsiel khâimu bang lâm,
Avânzawl a,zin bang thânmlâi in,
Tongsu saba lulvoh thâu nejou e,
Tongsu sielki ningzu dim dawnjou e.
Tângmansî bêl adimlet nejou e,
Lênmuol jamvâu ngâthun akâptan e,
Sâumâng dung,sâumâng vâi akânjou e,
Sâulim dawnvum,dawnvum sâulim sângkhup e,
Sumpi tûmkêh,suhtai sagi palsanta e.



2
Background [I]:- Neinou anu in alawmte toh singpo dîngin asawl a,Neinou in anu ngânhuonna dingin sil gilgil atom a,alawmte’n gamlah ah amatang in anuasie ta hi.
Asing gih mama ahijiehin akipatjouta sih a,gâl lam a tomi tânghawlpa apat dîngin achiel hi. Tomipa’n Neinou singpuoh apat lâi in amanu samzam zang khat abotdoh hi.
Neinou a inn atun in agilna in damlou in akipêhta hi.
Anu’n athoidam thei ding asuisui vangin amujou siha,athoidam a upleh atanu toh akitêngsah ding hi, achi pên Tomipa’n ajâh chiengin athoidam ding akipan a,amanu luzâng tungah asamzam aphutkia a, tuachiin adamsah a akinungta gêl a anu’n tunas atha hi. Ahivangin,apei nua un, Neinounu pên atanu ngâi sêngsêng in lungzuong in mâumâu ngîtngêt hi. Khosung tangvâlte atanu lading in achiel hi.

Background[II]: Nântal in Neinou ataipi,nitâh khomiel jouin tungvum pang khat ah akibu gêl hi. Tomipa’n a’ng nuadeldel a,tua tungvum pang langkhat ah alumta hi. Tomipa âinei ahijiehin amaute gêl mu ngeingei man teitei ding ahi chi athei man un Pasien leh Lungzai akikumkhawm uhhi.

II)PASIEN leh LUNGZAI KIHOUNA
Thangvân Sienmâng,Zailung houlungkum u’e.
Saliem e? miliem e? pal bang nan dîng koi?
Saliem e? miliem e? lum bang sun dîng koi?

Sato,saliem,satawn m u’n,
Azâng a atuo azâng ah anê e,
Akên a atuo akên ah anê e,
Akawm a atuo akawm ah anê e,
Saliem in,tohtoh nesuhthop maisuhthop e,
Ei hang theilou e,lungdam ngailou e.

Nanleh miliem’n min thei bang lou zêl e,
Sabeu lienlien butang lienlien,
Zutui satui pe masa e,
‘Ka Pasien na tai,ka lungzai na tai aw’ chie
Zailung lêng e; ‘Miliem hûm vâi chi e.

Nântal mâimit khuoimu tuo lâm ziziei lâl hie,
Lâl hie tunglâm khuoimu na nâmtempha tawi,
Bânzâl sang vâtsan bantan vâtsan pailien in!
Anâmtempha lehpai khuoimu nitunsuo e

Vûmtung kêntawng nitun kilia kilia kilia khoungawn e,
Amuol-ahaw vân bang touthawn e thawn e,
Ami-asa lâm bang kipâh Zolei ah.



3


III)NÂNTAL leh NEINOU VÂNTUNG A, ÂHSINI ASUONA U H

Gûngâl vângla phûmta u’e,
Gam mawngsing apou e,
Abâzâm mêngmêng gûngâl ah,
Phamsa nigêl ngai nalâi u’e
Mawng bawhkâi zâmkhawm u’e,
Gûngâl pansa kikawi u’e,
Kikawi u’e,kikawi u’e,kikawi nalâi u’e

Gam mawngsing phua e,ami’n sâtsât u’e,
Amawng apua mawngmawng lou e,
Khuoi bang hang asâtsât tel,
Atenten nên tumsing dimdem u ‘e,
Tumsing tumphuol taw u’e tawla u’e,
Kuong aw kuong aw chi u’e, kuonglou e.

Zeitha tawl sunkhing annphêl nê’n,
Singhîm nuoi ah tutkhawl u’e,
Tulsingpi puasuh vungvung e,
Vângkhuo guol zatam lâilou e



Sunkhing ann ne u’e ahiengtung ah,
Kâmmei sêm e, kuongmei kângtum e,
Kuongmei vângkhuo guol zatam lâilou e
Tungthangvân zawl ah tânglâm u’e,

Si-al vângkhuo nunnuom lâi ah buol kumtawnta u’e,
Si-al nêlkâi nigêl vângkhozawl ah êm singseng denlâi u’e,
Si-al nigêl êm singseng telingleng pheliplep etlawm u’e.




4

Thuteng poimawte:-

vângkhuo=khuo tângguol=tangvâl lumsiel=siellum
tongsu=khuttawng khat lulvoh=voh saba=sabeu,satan
ningzu=zu tângmansî=bumansî lênmuol=muol
jamvâu=vâu,vâujam sâumâng=inn sâulim=inn
dawnvum=innkhum vum sumpi=butang suhna sum suhtai=busuhna suh
hiengkawm=nuakawm zeitha=tha,zaitha lehtou=septou
Nounei=Neinou khâimu=mu avânzawl=vânlâi
thangvân=vântung Sienmâng=Pasien Zailung=Lungzai saliem=gamsa,sahâng miliem=mihing,mi houlungkum=kihou
satawn=gamsa tohtoh=mumu sabeu=saba
vûmtung=tungvûm khoungawn=shi bânzâl=khut
lâl=mêlma,gâl nitunsuo=tunni suo tumsing=tumphuol singtun
tenten=sât nel tumphuol=meiphuol lâilou=shi
sunkhing ann=sun ann kâmmei=meikâm si-al=âhsi
nêlkâi=bawhkâi vângkhozawl=khozawl êm=tânsiem
lungdam ngailou=kipâhdân theilou nâmtempha=temsâu,nâmsau