ZOKAM leh ZOLA

Zokam, Zo La Sat On The Wall,
Zokam,Zo La Had A Great Fall,
All The Zo Khangnous and
All The Zo lâisiems
Cannot Put Zokam, Zola
Together Again.
(With apologies to the unknown author of ‘Humpty,Dumpty). I Zokam uh mang ding hita,I Zola ngaipên, I Sânnêm late midangte’n tang sieng ding hita. I khangnoute leh i lâisiemte un bang e a bawl uh; Zunlou i gam pankâi denta ding amah? ‘Thou un, Thou un Z S.P Seinouguolte chi, a la maimai a sa ding i hi uh amah?.
Zokam leh Zolate gildan leh thuhdân pên leinuoi a suongmanpha kiphuolgu bang ahi. Mângkângte la phuosiem minthang William Wordsworth in ‘Lucy’ kichi nungâh mêl hoi mama, vân âhsi banga tâng, a opna mun in a zillou zieha, a pâhta ding leh ama va dei dîng mi omlou;(a kiphuol zieh-in)luidung suongpi nuoi a om tulpân toh agênte bangin; Zokam leh Zolate zong a lutna(apina) eite’n i mu phâhlou uh a diei aw maw! Manipur solkal(kumpi) in Class V tan ah singtângmite in amauh lâi chiet a kisimthei ding uh chinapi a, eite in laibu sim ching i neilou ziehun i tawi theisih uhhi. Tuaban ah Class X ah zong Vernacular subject a tawi dîng phal nalâi uhhi. Eite’n bang lâibu tawi ding?. Skul(sâng-inn)ah i naupangte un koi lâibu pên a simta ding uoi?. Mi lâibu sim (kawm) in mitesiemna i phajou na ding uoi? I Zo awjapute’n(sangsiete’n) bang lâi a hilta ding uoi?.

Zo Tangval,Zo Tangval Where Have You Been?,
I have been To Lamka To Drink Sekmai,
Zo Tangval, Zo Tangval,
Where Have You Been?,
I Frightened My Parents In The Kitchen
( With apologies again to the author of Pussey Cat. )

ZOKAM HAUSATDÂN
Leitung pumpi a kizang English ngêl sângin zong Zokam a hausazaw hi. Zokam a om tampi English ah a om sih hi. Lungthah chienga kitom tham zong hâm a nei sih u’hi. Awsie zong anei sih u’hi. Gêntêna in ‘Thalkin,Sashi, Dawng chie etc.te English in a kilet thei sih hi. Zokam a ‘Sa shi inlen; thalkin ngîlngêl bou aw” ‘kichi English a let dîng M.A. Double English a first class first khat man lei, a khosanêl in a hum(hlum) ngêingêi dîng hi. English te’n zong a nei sâm uhhi. Hinanleh, Zokam a apha zou sih. A nei sun uh ‘shit, fucking’ chite lel ahi. Ka nêulâi in ka khuo u’ah Khienglâm tangvâl sepai suty khat in zu a hing kham a, tulâi hâm a ‘phutani(tapousah)’ i chite uh sâphâm in a bawl a ‘Faking,faking’(fucking) a chi den kêi sâm hi. Alêna tahtah a kitheilou vângin Japan gâl lâi tan a ka khuo u’a English sepaite na om ahizieh un hâm hoilou ahi chi pên a thei u’hi. English te’n ‘Bastard’kichi khat zong hâmsie a nei phuat u’hi. Ei ngaidân mawh in, Englishte pên mi zâutat ahi uha, ‘bastard’ chite bangin zong va ngai khollou dîngin i gingta uh ahi maithei. Ahi’n a lungthah chiengun mi housietna in a zang vanglah u’hi. ‘Bastard’ pên ‘Zawlta’ china ahi.
Mi a mêl puohdân leh a gamtat, a hâmdan toh etkop in Zokam toh mi a kihousethei a, kipâhna ding zong a kigênthei hi. Englishte’n anei vawt sih u’hi. Lelaw,Pempom,Geigoi,Ngengngong, Ziamzuam,Hiauhuau,Lihleh, Chihteh, Vetvawt, chite Eng­lish ah a om vawt sih hi.
ZOHÂM KIBANG KIMLOU
Hâm mawngmawng amun leh agam zil in kipâi leh kibelap leh kiheng chite a om thei hi. Zo sungah zong gên ching sih nanleh Hâidawi hâm,Thangkhâl hâm, Khuongnung hâm i chite a pm nelnel hi. I tenna kho minte ahi hi. I suichet tahtah leh Zohâm dihtah pên Hâidawi hâm khu ahi. Bangdînga khokhat a hâm tuom pieng thei e? Nidanglâi in khokhat leh khokhat kikawmna a hâsa a,tulâi banga gari leh lampi zong omlou ahihi. Gâl- leh-sa hât ziehin zong khat leh khat kikawm theilou in a na om u’hi. Hun sawtpi kikawm lou a a op chiengun a khuo a khuo ah hâmsawi kainate ahiei a pieng ahi lel hi. Tuate hâm tuom ahi tuon sih. Hâm pên khosung tangvâl kiphasah khat apatin zong hâm a pieng thei hi. Nupi hâmkhiel ahiei leh mi simmaw pên khat hâmna chiemmui thu in a kizang zang a, a tawp ah hâm piching a suoh thei hi.
Kum 1955 vêl in ka khuo u’ah Kawlgam gâlkâp suty khat in ‘Kisai lou’ kichi khat leh ‘Kullou’ kichi khat a’ng polut hi. Nungâh tangvâl in kiphatsahna in a akizang a, a tawp ah khokîm vêl a mite in zong a zangta a’u,Singngât tâng ah akizang hi. Tuachi mabangin, Tangpizawl khuo ah 1965 vêl in ‘Ngai va doi sih’ kichi a hing kithang hi. Nupi hâm khiel khat kam a kipan lel ahi. Nungâh tangvâl in chiemmuina in a zang uh a, Ngai va roi sih’,Ngai rol sih, chipou in alum let u’a, a ,tawp ah ‘ngâi sih’ chi ahita a, a manna dîng mun tah a i man khâhleh hâm kilawm khat a suohta veve hi. Hâm kiphuothute a man dîng mawng ma ahi. Tuma lam a Tonglawn leh Behieng khotung vêl a kizang hâm khenkhatte ‘Geigui, Kitei aw’ etc. chite zong tuni in a mangta hi.

ZOKAM ANGAI MAMA HI.
Zohâm(Zokam) pên hâm ngai mama khat, hâm kilawm leh tampi kilawmtah a gên theina hâm ahi. Zohâm dihtah a thu kigen in mi lungtang zong a bun hi. Kum 1982 ni khat Moreh leh Tamu kikâl luigei ah ka na khawl a,Tamu nungâh thum Moreh apat hing kile uh,Kei khawlna geitah ah ahing khawl uh a,Zokam chiaset in ang kihou uh a, a sêu sung u’a a van,puohte uh,a vêl u’a ,a nui vangiam u’a, nungâhte mêl hoi ka sah zieh zong hituon lou in,a Zohâm pên uh nal ka sa mama hi. Kei zong hing thei sâm u’leh chi in a min uh ka dong a,a lamkâi nu uh min ‘Nge Nge’ ahi a chi u’a,Tamu a om ka hi uh zong a chi u’hi. Kei tungthu(tanchin) hing dong ta u’leh bang ka chi dawnta de aw?chia ka na kingaisut lâi in,ading uh a,bangma lah ahing dong nawn tuon sih u’a, zumsim mêlpuo in ahing pei santa u’hi.
ZOLATE
Zokam a hausat bangma in Zo late a na gil in a na thûh mama hi. I Khangthu uh, I pu I pate uh bang chibang mi a na hi uoi mah chi zong a la phuote uh i sah chiengin I theithei uhhi. Gêntêna in,la khat:-
a. Ka pienma a mi sîngta aw,
Apieng lah mi omlou e.
b. Luntawi khangtem bang kileh ing, Tung chieng vângkhuo sât ing e.
Ala suichien detdet lachin Khul ah i na têng uh a,Khul apatin leitung I na sât uh chi akilang hi. Azung nua et lachin ‘Ka pien ma a mi sîngta aw,apieng lah mi omlou e’pên ka pien main koima apieng sih achina ahi. Zo kichite mi bul i hi uh chi a kimu chienta hi. Sânnêmla Zolate sungah angaipên ahi hi. Koikoi in sata lehzong Zokam na mangte khu sânnêmla neitu leh akipatnate ahi uhi chia kilang hi. Kum 1957-58 ZângKong,Zo Sângnaupang Pawlpi Magazine Tedim kam a kigiel khat ah lalui, ka nêulâi a ka na zâhsa khat ditahin a’ng kigiel a, ala ahileh:-

a. Thangnêm nuoi a huisi dam lâng,
Khattang tutkhawl lung nei zuongsah ei lâizang chie.
b. Lung nei zuongsah ei maw,
Theilou sîngta ommuong guol tuom,sâm aw kawi lâizang.
chi ahi. Nuom ka sa mama a, aphuopa zong alungdam mama dîngin ka gingta(um) hi.
Atung a toh kikêlkî Magazine khat ka na sim kha lêulêu hi.‘Siamsin Pawlpi Annual Magazine-1969’ ahi. A Heading ah ‘KHANGLUI LATE’ a kichi a, la tampite a phuotute bangta lou in a original apat dei kaina tampi a om hi.
Gêntêna in:­
a. Tûn simthu lou vâimâng simthu’n,
Doulâi kullu dîng aw zuong na’ng e.

b. Kei aw zuong na’ng, nâsing nuoi ah,
Limlien gammawngsing ong seel aw.

A phuotu in ‘Limlien gammawngsing aw ei sêl aw:’ a chi hinapi ‘ong seel aw’ a chita hi. Khumbang ma in­-

a. Tu-a gammawngsing bang kikawi,
Zîngchieng sam bang khenta dîng aw e.

b. Zîngchieng sam bang khenta dîng aw,
Muolchin sâng pan donleng dîng e,
Don leng dîng aw e........ chi hinapi
‘Tulvum sâng pan donlâi dîng aw e’ chi in a dei kaita zêl hi. A kiphuo banga kigiel nawnlou in a la,la ngai mama hinapi a dauta hi.Ka kingaisut pha,kia a, hun tomkhat zou in kei leh kei a siemlou tanta hi. A gielpa in hasatah a, a sui nua a, a giel khiet ahia, a thei banga agiel ahi chi ka pom hi. Zohâm taluo asah man a, ahen ahizong ka gingta sih. Kei leh kei ka kisiemlou tansahna zieh ahileh, a neitu,a zûntu leh a kêmtu di’a guotte Zo kichite in Sânnêmla pên zûn zoulou, kêm zoulou ahi zieha, adihtaha, kigiel theilou hiin ka theita hi.Zolate ah ‘Lahâmtengte’ a tuom in a om hi. English leh kam dangte ah lahâmtengte a om sih chi thei ahi. La­hâmtengte toh la kisa in, lungtang a bun deu hi. English ngêl hou bangma a om sih hi. ‘Kang ngâi hi’ chi leh ‘I love You’ a chi lel hi. Zokam in chi lei ‘Mu bang hing ngâi ve’ng’ ahiei i chi u’a,a lûzaw hi. ‘Selung zuong e’ bang English in gên hâhsapi ahi.­ Pasien lah Sienmâng i chi u’a,Mângkângte’n God a achi u’a a henna dîng kân a om sih hi. Hichibang tampi a om hi. Kamteng a, a gênngamloute uh, la in a gên u’hi. Kingai thu hi in,kimuda thu hi in, bang thu bang thu hitaleh, kam a gên sâng in la a, a gênte in abunzaw hi.
Ni khat Nu.Chingnu ama ngen in lou ana hou(hlou) hi. Pa .Thangpu gamvâh lâi Nu.Chingnu te lou ah ahing suoh hi. Nu Chingnu in ama ngen in a hou(hlou) hi. Pa.Thangpu in gâl apat a gâlmu hi. A nungâh-tangvâl lâi u’a, ana kingâi kha uh ahi. Pa.Thangpu nu-le-pa in a neita tanu toh a kitênsah utna lam u’ah Nu.Chingnu toh ana khen u’hi. Ta a nei tuohta u’hi. Lawm lui leh lam lui kihai theilou hiding hiven, Pa Thangpu in a lougal pat in khutkawi tum in akouta hi. Nu.Chingnu in zong la khat a phuo pai a:-
a. Bânzâl sêmkawi Ngai na tongluon,
Na lênlâi lah a bang a, Ngai aw.

b. Lênlai lou buong lou bang tul kuon,
E! donda ta’w, Na bou e! Ngai aw.......a chikhum hiâu a, Pa.Thangpu dîngin agên dîng abeita a, tulâi banga “heart-fail” om hileh Pa.Thangpu bang achi diei aw maw?.

Laigielpa: Phamsa: Pu.ThangKhanLal,
Ex-President,UZO
[ZSP Magazine 1985-86 Vol.IV]
[Tami article gielpa ahileh Hiengtam hausapa Pu.ThangKhoChin tapa Pu.ThangKhanLal ahi.
1944 April ni 10 in a pieng hi.
1968 in Gauhati University nuoi a om D.M College,Imphal ah B A. a zou hi. 1965 Kum a Z.S.P Magazine khatna a Editor masapên ahi.
1967-70, Z S.P President in a pang hi. Zo Literature Society,Chairman leh Secretary in ana pang a lâibu tampi zong agiel hi. Aman a get nuom ahileh i gam sunga Lâisiemte leh i tangvâlte uh khanglou uh benlen lâibu giel lam leh i gam sunga dîngin a siemna uh leh a pilnate uh zang in nasêm u’leh a chînopna ahi hi.]