Tânglâi in Zo khuo khat a na om hi. Khumi khuo pên Tomite khuo toh a na kinâi sim hi. Khumi Zo khuo min Tuolzâng a kici hi. Khunah ngâhnu tampi leh guolhlang tampi zong a na om hi. Ngâhnu zousie lah a pat in, numei khat a kitangkhâi tuom a,amanu mêl a hoi mama hi. A kitangkhâina ahileh,bang dang ahi sih a,Pasien in ama hih tam leitung mitmâi a,mu dînga hoi thei tawp a,a zep ahi. Amanu khu a mu tapou leh a en khata pou in ama mêl hoidân leh a etlawmdân agên mangngil thei sih uhhi. Tuaci ahi,zieh in Tomipa’n bangci leh ka kinunpi thei diei ahisihleh ka kiguthei diei aw? ciin asun-azân in a lung asân gige a,a kingaituo ngîtngêt hi.Khumi numeinu khoheina zousie leh bawl cinteng,a kâihlit kawikawi a,a dapcin zing hi. Tam bang Tomipa lungsim ahi ci anu leh apa’n a thei bep un a lawmte toh ki-apmai leh kimawl dîngin zong a phalta sih uhhi. Anu leh apa in, atanu a dei sêngsêng zieh un a min dîngin vânlâi a,âhsi tânsiem khat a tap u’a,tuaciin,Neino hisah vâi ciin ‘Neino’ a’ng minvawta uhhi. Nikhat Neino nu in a kûng ah hichi in agên hi: “Lawmnu zîng a i ngân huon nadîngin sing vapota in aw” a ci hi. Neino in tambang thu a zâh bepin a lawmte kûng ah:“Lawmte sing vapota va ui” acita hi.
Neino in sing gilgil tom Aguolte toh gamlah ah sing podîng un a kuon uhhi.Khuchia sing a tom khawm lâi un,a lawmnu pên in Neino kûng ah: “Lawm kei pên ka nu in tulâi in sahâng gâlhâng a tam toh singthem sing kang pou hing tom ngâungâu in len hing kilepaita in ciin ei hil hi” acita hi.Neino lêng in: “Lawm kei pên ka nu in zînga,i ngân huon nadîngin sesing leh gising gilgilnou,gêlsing gil hing puo’n” ciin ei vâihlâh bou hi ciin a dawng hi.Tuazou in, a guolnu zong ama-leh-ama kipat pai in, a inn lam zuon in a tumta vingveng hi. Neino in pên anu thugette mangin sesing gil nou sing gilgilte a tom a, tuachi in, a singpuoh a gih mama tahi.A kipat sawm leh,a singpuoh gih sêngsêng ahimanin amatang in a kipatzouta sih hi.
Tomi tânghlonte Khucia lunggim leh lungkhamtah a, a op lâitahin, muoltâng gâl lamah tânghlonte in “Hei,ho,hei,haw,hai” cia kikou a ogin uh,azata hi.Tua gâl lam a,ogin a zâh bepin Neinou zong lungnuom sêng in: “Ka gâl a tânghawlpa awi, ka singpuoh ei pat di vawi aw,ka singpuoh gih sêngsêng in,kei matangin kipatzou si’ng” ciin a kikou hi.Khumi tânghlonpa’n hici in a dawngpai hi: “Ei gîng vateh! Ei gîng vateh!” ciin a kikou hi. Neino in khucia tânghlonpa’n a’ng dawn bepin,aw nêmtahin a hici ci hi: “Mi sap sa sapsap koi i kigîng diei?” acita hi. Khucia agên bepin Tomipa’n ; “Hitave’n, na puon in na lu ana khu inlen tuaciin nang patta ve’ng” cin a dawng hi. Neino zong a puon in ana kilukhu a,gâl lam a tânghlon pa kûngah; “Hing peita’w kikhulûp ta’ng e ” cia a get tahin tua gâl lam a, tânghlon Tomipa pên amanu pat dîngin a’ng kuonta hi.
Tomipa’n Neino samzam khat a dap bawpieh hi. Tomipa’n tua Neino khu a patta hi. Khucia Neino singpuoh apat lâitahin amanu puon awngkâh khat ah,agûhin a samzam zang khat a botdohta hi. Neino zong a singpuoh puo in apei a, inn a tun bepin a kàwng a ngâkhie a,a gil a lâi nat thuohla sêngsêng in,lupna sêna’n a kinei tadiang hi.A gil a lâi thuohla in a kipumpêhta pelpol hi. Nâsa taluo ahimanin anu kûngah: “Ka nu aw e,bang nei law diei bang nei law diei?,nâ e,si ing si ing e’’ ciin a gil a hûm vatun kawmin khosah-khohlang theilou in a pêngzâhta mai hi. Siempute a thoisah vângin amate’n bangma a lawdân dîng a thei tuon sih u’hi. Khucia gil nâ-lâi nâ a, a kikoukou bepin a nu in law dîng dân thei zoulou in a lungkham mama tahi. Tuacia lungkham leh mangbang a,ang op tâh ziehin a damthei nadîng ahi poupou leh, ciin tongciemna khat a’ng bawlta hi: “Ka tanu damsah a op leh, nu ahileh kizawlsah vâng,pa ahileh kinungsah vâng” ciin tawmsah lang nga kawm in, a kapkap ta hi.Tabang Neino nu thupuon pen Tomipa’n a zâhtah in ; “Pi,Pi bang ahiei na gên” ciin a dong ta mielmuol hi. Neino nuin a gênsa mabangin a gênpiehta hi. Tomipa zong lêng in; Pi e, keima’n thoi
dam vâng,keima’n bawldam vâng’’ a cita hi. Neino nu zong lungkham sêngsêng ahi ziehin Neino damtheina dîng poupou ahi nâhleh ciin Tomipa khu gingta in,tuaciin Tomipa’n Neino a thoisahta hi. Tomipa’n zong Neino samzam a na bawdoh pen amanu luzâng ah a phutkia pai leh Neino pên masanga bangin a’ng dam pailien hi. A natna zousie a bei sienga a’ng haldoh kiata hi. Khucia Tomipa’n a thoidam leh a damsah bepin a nu thuciem dungzui in Neino pên Tomipa toh a kinungsahta hi. Tomipa’n a pi kûngah Neino tunsa ei thata ve’n a cia, a pinu(a sungnu) in tunsa a gawpieh tahi. Voh tuh sagi a gol a kithat a, pasalte’n sa a sem uhhi. Tomipa pên sa siel nê ahi ziehin tua sa sielte a’ng et ciengin a kisem lâite a dugaw ta mama hi. Tua sa sielte a nêh nuom manin tuong hawm awng kâh ah,sateng leh sabeu a dap khie let a,a va nêh nuom manin,a nâmsua zah pen,a khiehsuo a kipang hi. Nâupangte kûng ah ; “Nâupangte aw, ka nâmsua ei va tun pieh ta vawi un” cia a sawl leh,tua nâupangte’n a tung nuom sih uhhi. Tuaciin,amapa va kuon suh in a va kitun a,agûhin,tua sabeute leh satengte pên a sielpi in tuong neiah phohphoh ciin, a hlâi guamguam a,a va kinêhta hi. Nâupangte’n Tomipa sa siel nêh a mu bepun Tomipa sa siel nê ci in a kikouzâh u’a,alang(a dem) valuoi uhhi.
Neino leh Tomipa tomite khuo a zotna
Zo tawndân a,tanu hlâhna zousie a kizaw bepin,Neino nu in tunsa sa beng guong in,a pasal te inn lampei dîngin a a nâunu toh a tunsa podîngin a sawl a,tuaciin a peita uhhi. Khucia Tomipa gam lamzuon a, a peipei uh leh lamkim khat ah luita khat a na om a,tuanah sûn-ann a’ng nê uhhi. Sûn-ann a nêhzou bepun Tomipa’n a zinu kûngah ; “Ngaino tuin mi pheiphung suon bangin na suon nuom ei? ahilouleh vazuong lên in,na lêng nuom zaw’i ?” ciin a dongta hi. Neino zong lêngin; “Ou,nangpa vazuong lên a, i lênthei tâh in nuom mabou ve ei” a cita hi. Tomipa’n zong Neino a mei in, a zieltawm a, a tou lênpita vungvung hi. Neino leh Tomipa’n a nâunu uh, a nuasie suhthop tamai uhhi.Tuacia,vazuong lên a,vânlâi a, a’ng lên vavung ciengin,a nâunu’n a nua mu a,a dâ sêngsêng manin a hlitui a naptui toh a kitehta hi. Lamdangsah pum in,kap kawmkawm in a inn lang ang zuonta hi. Inn atun bepin anu kûngah,hiciin a gên hi; “Na tanu dei pên muolsawm muolza ah tumta,muol a tumphe bangin a pheliplep u’a a tum mangta uhhi” aci hi.
Neino tandoh dîngin cielpina om
Neino nuin a tanu Tomipa toh a kinunsah hângin a lungkim thei ta mawngmawng si’a,tuabepin thuciem khat a khosung ah a’ng phuongzâhta hi,tuapên bang e i ci leh,amanu’n taci’n a gên hi: “ Tulâitah a, ka tanu lazou a opleh ka voh tûhnga gawpieh vângin,tângmansî phehgol dimtah toh ka zubêl sawmtah toh mêsah vângin, ka tanu Neino toh kinungsah vâng in;tualeh ka hâusatna teng leh ka gam luosah vâng’’ ci in thuphuon a’ng bawlta hi. Tuaciin,khosung a tangvâl hât teng a hlânkhawm,a voh tuhnga a that a,zubêl bêl sawm a tâtkhie a,tângmansi phehgol dimtah a huon hi. Neino la zou dîng etkhietna in Neino nuin,tangvâlte silbawl dîngte a getkhiet pieh hi. Tangvâlte kûng ah hiciin a gên hi ; “ Na siellum uh vân lam a, na lêhtou dîng u’a ,tualeh tuol a a’ng tuhsuh kia masangin; vohthâu saba tong tan khat,na nêhzou dîng;zu sielkî tong tan dim na na dawnzou dîng;tângmansi bêl khat na na nêhzou dîng;muol a vâuzam kihlung na thalpi a,na na kâptan dîng; inn dung, inn vâi na na kânzou dîng;sumpi na na tupkêh zou dîng; suhtai sagi na balsan(tawnsah) dîng” a ci tahi.
Neino hunkhe dîngin Nântal kipan
Khumni in tuami khuo ah,Nântal leh Phuthil tegêl a ninu uh,kawm in a na tâm uhhi. Neino nu thugên zuiin tuami khosung a om,tangvâl zousie khatkhat in,a’ng kicieng dîmdiem ta uhhi. Neino nu thupieh silbawl dîngte abânbân in,a’ng bawlsawm cietta uh a;hinanleh koima khat bêh in,a bawl kûitung zouta sihhi.Tambang,Neino nu thupuonte Phuthil leh Nântal te ninu in a zâh ciengin, “Ka nâu Nântal in bawlzou ma dîng hive’n aw,va hlânta un”a cita hi. Nântal pên mi hât mama leh,teipi khawsiem leh thalpi kâpsiem mama ahi. A u pa Phuthil pên mi nusuoh simpi khat ahia,a ngêhhâm leh mi meipuoh mama ahihi. Tua mabangin,amauh unâu a va hlânta uhhi. Nântal in zong a lâhzou leh,Neino toh kinung kitêng dîng ahi cia a thei bepin a’ng kitawngtoloh mama hi. Ki-etna mun a’ng tun tahin,Nântal zong kipanpai in a siellum man pai in,a vân langah a lehtou vungvung a, tuacia vânlâizawl a, a thâm denlâi in ama’n a silbawl dîng teng a na bawlman zouta pailien hi. Tua zaw in, Neino hundoh dîngin Phuthil toh,a siellum,a thalpi leh a nâmsâu toh gamchin muolchin a’ng suita uhhi. Tuacia,a’ng peipei uhleh;Phuthil;mi meipuoh ahi ziehin,gam-mâng lah a, ju leh vate hâm pou a zâh ciengin a khita a,a zâu mama ta hi.Sa ketot pou, a et ciengin a ci a kilîng let hi. Buonnawi na mun khat a’ng tun bep un, Phuthil in topi( tawpi) ketot a mu tahi. Nântal kûngah; “Nântal nâu dei tami bang ketot e?’’ciin a dong hi. Nântal zong lêng in; “Ju kholoh,va kholoh’’ ciin a dawngta hi. A peipei kia u’a,munkhat ah,amasa a mabangin,Phuthil in Nântal kûngah a dong ta thimthem hi. Nântal in zong Phuthil thudohte cimhuoi sain ; “To(Taw) ketot mu ketot “ciin a dawngta hi. Tambang thu a zâh ciengin Phuthil zâuna a’ng kibelap a,amapa zâu sêngsêng in Nântal kûngah hici in a gên hi;
Nântal in Phuthil a nuasieta hi.
“Nântal nâu dei keipi zâu bou ing e, ke’n tanah na’ng ngâhta vâng na ngentang im va kuonta’n” aci a,a zuingamta sih a, mun khat ah,a khawl den tahi. Khumbepin, Nântal in zong,a opna dîng kul khat a khawpieh a, âhluitang khat leh zawngpi khat toh a nuasieta hi. Kul sungah tuinâh khat a bawlpieh a,a upa kûngah: “Ka u tami tuikâi nâh,a’ng nieh a, na âhluitang suong a’ng dup leh,asi ka hita dîng hi” ciin khumnah,a nuasieta hi. Nântal a kuonzaw in zawngpi khat in khum tuikâi nâh a va niehsah a, Phuthil in a mu bep in, Nântal pên asi hita ciin a kap ngêtngût a valon ta a,tuana om zawngpi toh a kinungta hi. Nântal zong amatang in a peipei a,ni thumzou in Tomite khuo khat ah,a tung hi. Neino a om diei mah? ciin a kankan lele a,a sui kawikawi leh a’ng muta ngêi hi. Nântal in Neino kûngah;“ Na pasal hei’a om ahiei?’’ ciin a dong hi. Neino lêng in; “Ka pasal gamvâh ahi, ama hing tung leh nang hinkhawi sih va’n,nang that ngêingêi va e’’ ciin zâusah kawmin ahilta hi . Neino in, a gaptung a,pheh gol kikoi sungah amapa a dap phuolta hi. Nitâh in,Neino pasal;Tomipa a’ng tung hi.Ahing tun in, azinu kûng ah; “Tuni in i inn liem gimnam; liem gimnam’’ ciin sah leh hlang a phên kawikawi tahi. Khucia,Tomipa opdân Neino in a mu bepin,Neino in a pasal kûng ah;“Tubep a na thei pan amah? achîl a patsa liem ka hi chi na thei lou amah?Nei ît sih leh ei khûl maita’n’’ ciin phawhkawm in a houseta hi. Khumzouin,Tomipa zong kisuongla kawm in; “Nangnu,ka gilkiel e, ann hing bawlta in”aci hi.
Nântal talpang apatin sisan luongkhie
Neino in Tomipa dîngin ann a bawlpieh a,ann a nêh lâi un,gap tunga phehgol sunga a phuolpa adîngin sabeu(saphê) tûituoh tahtahte gap tungah asep tou a; “Lungmê, khâumaw, a na tai aw; ka Pasien ka Lungzai a na tai aw” ciin sabeu tûituohte a septou hi. Tuamabangin Tomipa’n zong Neino ci mabangin sagu baw khat nâhpitahin a septou leh Nântal talpâng(lutang) a sepkha a,lu leikou citah ma,a lutang apatin sisan a’ng suoh a, gap tunga kuon in ûm a bua bangin a’ng luongsuhta hi. Tomipa’n a mu bepin ; “Bang ahiei khuna hing luongkhe suh ?’’ ciin a en dîngin a’ng dîngdoh hi. Neino mi lungsim kintah ahimanin,“Na gongkha,na dang kha,nangpa i gap tunga a ka ûm koi sunga,ka sasi koi na sepkêhta khula ’’ ciin a phawhsie a, tualeh Tomipa mâitang a,sisan bâng khu a puon nengthem in a siapaita hi. Neino va pei in Nântal talpâng a va siapiehta hi. Khumzouin,Neino in Tomipa a mût sepsop a,bangbang a du diei, ciin a lungsim lam a sûisûi tahi. Neino in zong ngian bawl in Tomipa pen zucia mama a puo sipsep a,tuaciin zânlâi in a dawnsah a,a khuci tultulta mai hi. Tomipa’n a du lâisie a dawndawnsah kuom hi.
Neino in Tomipa zu a têkham ta hi
Tuaciin Neino in Tomipa zu a têkham hi. Tomipa’n zu a kham bepin, a kilawmliata hi. Khucia a kilia bepin, Neino in zong siatûl khat a emsa a, tuami in Tomipa ciltaw a dêpieh hi. Tomipa’n nâsa sêngsêng in;” Tu lâitaha, ei that nuom ei man nuom koi ahiei?” ciin a gâlgîh vavung hi. A hicici bepin, Neino zong lêng in: “ Mimopa, na zudawn kham lâitahin aw cina khat omta leh nei vêng zou dieimah? ka cina a hibou hi” a cita hi. Neino in Tomipa pên zu a tultulta mai hi. Tomipa’n zu a kham mama ta hi. Khuo a thei na lâi ei? cia a teptêna dîngin,Neino’n siatûl khat a emsa kia a, Tomipa bildawn a dêpieh leh amapa bangma khuo phawh lou in a kilawmliata hi. Tua bepin,Nântal a kiphuolna apatin a’ng kumdohta hi. Tomi khuo apatin Neino a’ng pûimang doh sawmta hi.
Nântal in,Tompipa a tawhna thute
Neino a pûidoh kuon in,Tomipa innsah pa kûngah hici a gên hi: “ Tuin mi kisa pasal kisa ahileh,ka bîng uh hing nuadel va’ng a ci leh,tam ka bawl zousie a’ng bawlzou leh,ei nuadelta heh aw ” a cita hi. Tua a silbawlteng tam bang ahi: (1)Nâtal in a masapên in a sumpi a tup leh a tûmkêh pai hi.(2)A inn dung a kân leh a kânzou pai hi.(3)A inn vâi a kân leh, a kânzou pai hi.(4)Suhtai sagi a pal leh, a palsanzou(tawngAsahzou)hi. (5)Khuomuol a vâuzam kihlung a thalpi in a kâptan hi. Tamteng a bawlzou in, Tomipa a tâisan u’a Neino pên a kizawpita hi. Zîngmawng khovâh in Tomipa a’ng khanglouta hi. Neino aw e, cia a hlat leh, koima’n a dawngta sih hi. “Hioilah! ka zi lah, ei kigûhpieh hita va e”ciin suh leh tou, ah Neino sûi in golumle in, a kileh kawikawi hi. Tuacia Neino a suimaw bepin,a innsahpa a doh leh, “Mi pasal khat in a pûimangdoh ta a, ama na nuadel dînga ahileh, a tohteng leh a bawl zousie na bawlzou leh, ei nuadelta’n a ci hi. Tua a silbawlte tamteng ahi:- Sumpi na tup kêh dîng; inn dung na kânzou dîng; inn vâi na kanzou dîng;suhtai sagi na palsan dîng tualeh khuomuol a vâuzang kihlung na thalpi a, na kâptan dîng” ci’n ahilta hi. .Tomipa zong a’ng kipanpai a, abânbân in, a’ng bawlzaw sawmta hi. Sumpi a tûm leh kêhzouta lou e; inn dung a kân leh a kimlâi ah a tungzou hâmhâm hi; Innvâi a kân leh a kal langkhat inn tungah a kinga hi. Suhtai sagi a pal kia leh,a ngalta a koh hi. Atawpna dîngin khuomuol a,vâuzam kihlung a kâp leh a kâptan zouta sih hi. Zum leh da kawm in, pasal kisa vethou a va del dînga lah, Nântal silbawlteng lah bawlzou lou ahimanin,a del lou dîng lah,a zinu kipuimangdoh ta ci thu a tuot ciengin a lungthah mama a,hizongleh lah,ama pen zâuna leh kingamlana lungsim pokawm in,amate a’ng nuadelta hi. Khuomuol lam ah, zu lên va lên in a lêngta zinzen a, khomuol kal khat a suo vazieu hi. Tomipa nuadel phâh dîng a zâu man un,Nântal leh Neino pên, gilkiel,dangta,gimna leh bâsapnate don manlou in a tâitâita uhhi. Gamlapi apatin
Tomipa’n amani a’ng gâl muta hi. Khu gêl a’ng gâl mu bepin,lung thah sêngsêng kisa in a bah kâipi hâ thin in,a thing thopthop,a’ng suatâi sêmsêm hi. Neino khatvei a kinua hei leh,Tomipa bah kithing nelnul pum in amate lang hing zuon a muta hi. Tomipa’n Neino kûngah na khawl in a ci hi. A ci vângin amate gêl a khawltuon sih uhhi. Nitâh a’ng hi bepin khuo a’ng miel a,khomut hun tan in,Tomipa’n,amani,a pha zouta sih hi. Khomut ziehin a tâina lampi uh a thei zou nawnta sih hi. Nântal leh Neino tegêl gim sêngsêng leh bâsam mama ahi ziehun tungvûm pang khat ah, a’ng zân gieh dîngin a’ng kitawldamta uhhi.
Pasien leh Lungzai kihouna
Tua banga a op lâitah un, Tomipa bangma thei loupi’n tungvûm pang lang khat ah,a’ng khawldamta hi. Zânlâi in Tomipa khumi tungvûm kîmvêl lah a,h a vâh kawikawi leh,miliem gimnam a’ng zata hi. Ahivângin, Nântal leh Neino pên a mu khasih hi. Tomipa pên âinei a kihlêm thei ahiziehin khutegêl mu têitêi nadîngin phûisam in a om a,a lungmuong gawp hi.
Tam bang, dinmun a, miliem leh saliem a’ng optâh ciengin,zânlâi in tunglam a om Pasien Pa leh Lungzai a’ng kihou uh hi. Pasien in Lungzai kûngah: “Miliem i panpi diei, saliem i panpi diei?’’ciin a dongta hi. Lungzai zong lêng in:“Mihiem in thâzou leh matzou a nei leh a’ng thei gige a, tualeh zong zu leh sa a nêh kuon ciengin,ka Pasien na tai aw, ka Lungzai a na tai aw;ciin sabeu lienlien butang lienlien,zutui satuite a’ng pe masa cîtciet a,tualeh a’ng pâtawi ngîtngêt hi. Hinanlehzong, saliemte,taw(to) leh mu,in tambang thute a citâh zaw sângin; a zâng a,a tuo a zâng ah a nê a; a kên a, a tuo a kên ah a nê a; a kawm a, a tuo kawm ah a nê hi;bangdînga mihiem i hutlou dîng e? Mihiem i hut dîng ahi.” ciin Pasien Pa kûngah a ngâidân a peta hi. Pasien Pa in zong Lungzai thugên dihsa in, a thugên khu a pompiehta hi.
Nântal in Tomipa a thâna
Khumi,zânlâi in, Nântal leh Neino a kimuttui mama uh a,tuacia a kimuttui lâitah gêl in,Nântal in mang khat a nei a;a zâlmang in oging khat a zâ hi, tua oging in hici in a ci hi: “Nântal na tungah khuoimu khat hing lâm e,na lâl hie, na nâmtempha zûn in len vâtsan pai in” a’ng kici a zâh bepin,amapa zong a khanglou pai hi. Tambang oging pên o maimai ahi sih ci a thei ziehin,amapa’n zong a kho-hlung a, a nâmsâu pâisiet khinkhian khu a pâi akuonin a’ng dohdoh a, zûnkhe pai in,tuatahin,a tunglam a,lâm khuoimu khu phet ciin a vâtsan paita hi. Tua khuoimu tunni kisuo pailien pen a’ng kiehsuh tahin Tomipa lêng lâi tunni kisuo pailien a’ng suohta hi.Tuaciin,Tomipa a’ng thatta hi.
Khum bepin,amate gêl a peipei u’a gammâng lah khat ah a’ng giehta uhhi.
Azîngni in, a peipei u’a, Phuthil a na khawlna mun lam a’ng zuonta uh hi. Phuthil in, a nâu Nântal pen Tomite khuo a, Neino va hundoh dînga thâm ahiziehin,sawtsa mama hi. Nântal a’ng peipei leh lampi thuom ah, zawngpi khat singpuo a’ng muta a, zawngpi singpuoh lam theikha na’i si’ng e! ci toh thuo in a sâtlia paita hi. A thongpi sungah a guong a, a pota hi. Inn a’ng tun bepun, a u-pa kûng ah : “Hi aw, u tami zawngpi hing em min vawi”a cita hi. Phuthil in, tua zawngpi pên a mu tah ciengin ; “Nântal nâudei tami na mou hilou î ?’’ ci kawmin, a kapta hi.Nântal lêng in; zawng leh mihing kinung ngai sih a ci a,tua zawngsa,a huon u’a, a min bepin, a hluohbu a u-pa a nesah leh, Phuthil in tui sa mama in,hici in a gên hi: “Nântal nâudei tui vaphiam bou e!” aci hi. Tuaciin tûitahin a ne pialpual hi. A’ng peipei kia u’a,munkhat ah zân a’ng hi in,tumphuol a dêng u’a, a’ng giehta uhhi.
Leimidawngte toh a kinîlna uh
A giena uh gâllam ah, Leimidawngte a om uh a, amahaw husa leh thawmgin a theita uh hi. Leimidawngte’n Neino mêlhoi ci a thei u’a,amanu pên a’ng matsawm leh a’ng lâhpieh sawmta uhhi.
Leimidawngte in; “Ka gâl ate koi leh koi na kinîl uoi?’’ ciin a’ng gâldohta uh hi. Nântal in hici in a dawng hi: “Keima Nântal toh Phuthil toh,Neino toh ka lum toh ka nâmsâu toh, muol a salâng ka thâ,keima gûn hlî lâng ka bah,keima meikâm kuong ka bah” cia a’ng kikou leh Leimidawngte lungzâu mama un a kikhîn mangta uhhi.Taciin sawtpi khat a kidêh dêhdêh uhhi. Zânlâi a’ng hita a,Nântal a kimut suoh mama ahi ziehin Phuthil pên Leimidawngte dêh dîngin a’ng ngansieta hi. Zânsawt nua khuovâh kuon langin Phuthil pên a’ng gim mama ta hi;kimut suoh kawmin Leimidawngte a kidêhpipi leh, bangbang a gên dîng e? ci zong a theisiem nawnta sih a; tuaciin amapa’n Leimidawngte hici in a dawng hi: “ Phuthil in Nântal toh gûnkuong a salâng ka thâ keima gûn hlî lâng ka bah,Nântal meikâm kuong a bah’’aci hi. Tacia a ngêhhâm pen Leimidawngte’n a zâhtah un Phuthil o(aw) ahi ci a’ng thei bep un,thakhat in, a giena uh a va buluta uhhi.
Neino kimatna
Tuabepin,Neino Leimidawngte’n a manta uhhi. Phuthil lei a dawdohpieh u’a tuaciin hâmtheilou in anuasieta uh hi. Khuo a’ng vâhta a, Nântal a’ng khanglou hi. Neino op lou a’ng thei bepin ;“Phuthil,Phuthil Neino hei’a om ata ei,Neino hei’a om ahiei?’’ ciin a dongta thimthemta hi.Phuthil zong hâmthei lou ahi ziehin um tun, bêl tun, bangin a kitung belbol a; a,a,a,u,u,u; ciin Leimidawngte peina lang en in,phâiphêng phung lam a kawhkawh maita hi. Nântal in, a uitang pui in Phuthil toh Neino sulnua zui dîng in ama kawmuna lam a’ng zuonta uh hi. Tuacia a’ng peipei uh leh, lam gei khat ah phâiphung khat a na pou a,tuami mun a uitang in, a va del a, a mun a tun bepin kong,kong,kong,kang,kang ciin a kawh kawh a, a kutcin toh pang in leisâi a khuot hi. A uitang in phâiphêng phung a va khuot na mun ah,a vapei a, tua phâiphêng phung khu a va phungkalta a,tuacia, a’ng etsuh leh,khuo khat a mu ta hi. Nântal in khâu khat a sât a, Phuthil kûngah: “Phuthil,Phuthil na khâu hing zûn aw, ka ci ciengin hing zûnsuh in aw”ciin a kihilta uhhi. Nântal in khum khâu kizûnsuh tu in Leimidawngte khuo ah a kumsuhta hi. Leimidawngte khuo a va kum leh Neino a na om ngut hi. Amaute’n Neino a mat uh, kipâh,guolnop, zu nêh sa nêhna a na nei uhhi. Leimidawngte kûngah Nântal hici in a gên hi: “Neinou leh Phuthil lêi ei pie un nei pieh sih uh leh ka lum hing thing leng,ka tei hing khaw leng,ka thal hing kâp leng na unpi un, na si gam sieng dîng uh hi”ciin a gâlgîh hi. Leimidawngte in Nântal kûngah : “Nang lum thin vâng in, nang tei khaw vâng in,nang thal kâp vâng in, koi khuo koi tui si gam sihva’’ ciin a dawng uh hi.
Neino kihlâna,Phuthil lei kipiehkia
Leimidawngte’n Nântal thugette a tahsan lou ziehun,Nântal in zong a hâtna leh a silbawltheinate a suopai a,khumi in, Leimidawngte tampi a si uh hi. Tuaciin, Leimidawngte zâu sêngsêng un,Neino leh Phuthil lêi Nântal kûngah a pepai kiata uh hi. Tuazou in,Neino leh Phuthil lei khâu ah a khî a,tunglam a, om Phuthil kûng ah: “Phuthil,Phuthil, na khâu na zun aw” aci hi. Phuthil in khumi khâu a na zûnpai hi. Phuthil in Neino a na kâitou a,a lêi a kilâh a, a kivaw kia pai a, tuaciin a’ng hâmthei kiata hi. Phuthil in khâu khat ma Nântal kâitou nadîngin leinei lamah a khesuhkia a, Nântal in khumi khâu a zam pai a,Phuthil kûng ah: “Phuthil na khâu a na zûn ve’n,na khâu na zûn ve’n’’ a ci hi. Phuthil in Neino a hlagul manin, ale amah in a nâupa ahi ci dawng hi: “Khâu a na sâttanta’n na ci a’mah?’’ a cita mawh hi. Phuthil in Nântal dîngin khâu a zûnpieh ta sih a,a sâttanta hi. Neino a kipûimang tahi. Nântal pên Leimidawngte khuo ah a nuasieta hi. Neino in Nântal a ngâi mama a,dâ mama in a kapkap ta a,a mâumâuta hi.
Nântal in Leimidawngte khuo ah tate a nei hi. Khuciin,Nântal pên Leimidawngte khuo ah a nop a da in a’ng têngta hi. Amate toh a kigop a,Leimidawng numei khat zi in a nei a,ta 4(li) a tawi uhhi. Khuciin a’ng luhing(khosa) tou zêl uhhi. Leimidawngte toh a kipawl vângin a lungsim a nopthei tuon sih hi. Bangci leh,Neino toh ka kimuthei kia diei maw?, ci in asûn azân in a lungsim a gêlgêl tahi. Lunggim mama kawm in,a innsahnu kûngah a gentheinate a va sût a,a va gieutâu ta hi. Tua nupi nu in a na lungsiet man in,kânggui khat suon in ciin a thu hilta hi. Tua, a innsahnu thumang pai in ama’n kânggui khat a’ng suonta hi. A zinu khu’n amapa lungsim a theisiem ziehin a tate kûngah: “Khuna,na pa kânggui suon pên a’ng mên pat cieng’n leh, a zîh va sihtan paipai un ahisihleh na pa pên tunggam lam ah a kikâimangta dîng ahi”ciin a tate a hilpil a,a tate’n zong a nu hil bangbang in a bawl let uhhi. Tua kânggui pên leitunggam a, zâmman lou in a sihtan paipai uhhi. A lungdon manin Nântal pen Nupinu kûngah a va hawkiata a,a va kikuppita hi. A tate in tua kânggui pen a sitan paipai ahi,ciin Nântal a hilta hi. Tuaciin,Nântal in zong a tate kûngah;
“Tu langkalsie khuna kânggui zîh sihtan kia ka thei leh ka thâ dîng ahi” ciin a gâlgîhta hi. Khumi kânggui pên zânkhat thu in a na khang sâu pailien in leitung ah a na zâmtou a, vân toh kidêp phiel in a na zâm hi. Nântal in zong hun mansuo kêi lou in, tua kûânggui zût in,tunglam ah a kâitou pai hi. A nei lang a,a tate’n “Pa,pa kei zong hing pei vâng,ei nuasie si’n,ei zawpi bou aw” ciin a kap lieiluoi uhhi. Ama kawng leh sakhâu tu in a kiluoi valuoi u’a,a tate kâ leh mâu a mu ciengin a lungsiet mama zêl a khuciin ama a kâitung thei zêl sih hi. A innsahnu kûngah a va pei kia a, leitung gam a kâitou thei nadîng bang a om diei? ci in a vadongta hi. Nupi in Nântal kûngah hiciin a hil hi: “Na kâitou ciengleh na thongpi sungah tângvâi(vâinêl),a dim in kipuoh inlen na tate’n a’ng kâ ciengleh na tângvâi(vâinêl) puoh khu thêkhum suh lacin a mit u’ah tu vâ’n,a mit uh a nuoi lah kâh un leitung langah na tung man ta dîng hi ”ciin a hilkiata hi. Nântal in nupi nu thupieh bangin a bawl a, tunggam a tungta hi.
Nântal tunggam a'ng tungta
Nântal leitung a a’ng tun bepin,Neino opna a theizouta sih hi. Uimaw gamsu bangin a’ng peipei a,munkhat ah, a’ng tungta hi. Tua mun ah,sang-âh in âh -pi khat a na em lâitah a’ng tuohkha tahi. Nântal in; “Hei’a na mat ahiei ?’’ ciin tua sang-âh a dongta hi. Sang-âh in: “Neinote inn neia ka mat ahi.” ciin a dawng hi. Nântal in sang-âh kûngah; “Ke’n tami âhpi nang na empieh vângin tu’nle tâi zinzen in len,khum mun ah,va kuon kia in len Neino te âhpi kâng khat va man kiata’n len,na’ng kile ciengleh lampi tungtawng ah,a mul khatkhat in hing botthâng malam in aw” ciin a sawlta hi. Nântal gên mabangin sang-âh a kuon paita zinzen hi. Neino te inn, a tung a,a inn neia âhpi kâng khat a manta hi. Nântal thuhil bangin tua âhpi multe khatkhat in, a’ng botthâng malam a,Nântal opna a tun tadongin,a bot pheiphei malam hi. A kûng a’ng tun bepin sang-âh pên, Nântal âhpi emsa ne dîngin a kinêmta mama hi. Hinanleh,Nântal in tua âhpi pên a na emta sih hi. Nântal in sang-âh kûngah hiciin a gên hi; “Âh na mat ciengin em sese da in,mite’n hing thei va un,nang del va un, na âh mat a’ng lâhpiehta dîng uhhi.Tua sângin a multe botthop in len,a kinkin in, kinêh lacin na hamphazaw va” ci toh thuoin tua âhpi khu sang-âh mâi ah a tuolseta(pâisuhta) hi. Tuani apatin sang-âh in âh a mat ciengin emlou in ahing in a neta hi.
Nântal Neino kûngtung Tuaciin Nântal in tua âh mul kibotthângte a’ng zuizui a,Neinote inn sah ah a’ng tung ta hi. Neinote inn a va lut pai dîng lah a zum ziehin,a innsah nu uh kûngah khiba zua a va kipangta hi. Tua nupinu in a khiba zua a lei nuomta sih hi. Nântal in a inn hlangte kûnga a va zuapieh dîngin a ngên hi.Tuacia, a kihou lâitah un,Neino in a za a,Nântal osuo(awsuo) kisûn a sa pai hi.
A innsahnu in tua khiba khu Neino a va zuata leh,Neino in zong tua khiba a mu tahin, Nântal khiba ahi ci a thei pai lien a,Neino in ; “A neipa hei’a om e?’’ ciin a dong paingâl hi. Tuaciin,Neino in Nântal a va kimupita hi.Tualeh,Neino kisuongla kawmin,sil opdânte a kip akawi in,Nântal kûngah a hilsieng hi. Neino in Nântal a na ngâi na lâi mama hi. Nântal in amanu a ngâidân thute;leimidawngte khuo apata a’ng pawtdoh dânte acien atâi in a gênpiehta hi. Kingâi sênsêng ahiman un, mawng bangin a’ng kikawi pum paita uhhi. Nântal in Neino thusûtte a zâhkhiet ciengin a lungthah mama hi. Phuthil pên nop hinsah lou dîngin a lungsim sungah bangbang pi a’ng ngaisutta hi. Phuthil a’ng tun tahin,Nântal,inn sunga om, a’ng mu phetin Phuthil zâuna,kisuonlana leh zumna toh kidim in,Nântal kûngah khupbop pai in,ngâidam a ngên hi. Nântal in pen Phuthil a u-pa ahiziehin a that nuom sih hi. “Nasep na nuom ei, ahisihleh âhtate hun na ngâpzaw ei?” ciin Nântal in a dong hi. Phuthil in âhtate hun dîng ka ngâpzaw hi aci tahi. Nântal in a u-pa ngalta a hliehtawng a; tuaciin Phuthil pên heima ah zong ding zou leh vâhdoh theilou in innzâng ah âhtate hung in a mangta hi.
Neino in Phuthil'a dîng âi a dênna
Phuthil pên gilou mama a sah ziehin, Neino in thuohla mama kisa in, a mu da mama tahi. Nitâh khat mi thei lou kâh in,Phuthil thâna dîng vâi a sawmta hi. Tuaciin, Neino in nitâh ann nêh kuon in Phuthil nêh dîng âi a dênpieh tahi. Nântal adîngin sîng a dênpieh hi. Phuthil pên a tâzaw ahimanin,ni mu masa,hla mu masa citahma,ama kilungsim bawl a na thei kiûkiâu hi. Nitâh a’ng hiin Neino in annkuong amate gêl dîngin a’ng lûita hi. A annêh lâitah un,ngian siem Phuthil hâm in; “En vawi uh,khuna mupi lêng khu gol sâm e!” a ci leh khugêl in tua pen mupi tahtah hiva cia a-et kâl un Phuthil in a hlêngkuong uh a na hei tuoh manin,tuaciin ama masang ah sîng kidêng pên a omta hi.
Nântal leh Neino sina
Nântal mâi ah âi kidêng pên a omta hi. Nântal in a mâi a kilûi âi kidêngsa khu a ne a, a gûi pai hiâu a, a shi paita hi. Neino in Nântal shi nua in a ngâi mama a,sun leh zân in a kapkap ta mai hi. A kâlateng hici in a bawl hi: “Âi ka dên,âi ka dên Phuthil dînga âi ka dên; sîng ka dên,sîng ka dên Nântal dînga sîng ka dên aw e;Nântal luong in sawngta zaw; [valuh luong leh vahlânhla sung pâlva’n bawm e],Nântal na hânkuong zâng ah sielching nâupang tânglâm e” ciin a hlitui a naptui toh kiteh in, a kapkapta hi. Neino in Nântal shi a ngaituo ciengin a pûl a doula mama hi. Neino hûiva bangin a mâumâu denta mai hi. A lungkham sêngsêng ziehin Nântal kivuina hân zong a theizouta sih a,koima in zong a hil sih hi.Neino a peipei a, gampalah ah,sielching nâupangte toh a kituoh hi. Tuate a va doh leh, amahaw’n a thei uh ciin a gên uhhi. Neino in sielching nâupangte kûngah: “Nântal hânkhûh na lâi un len,tualeh,ama luong na laidoh ciengun keima zong ka nâmtem in kisunlia vângin ama toh tuaciin ei vuithata un,tuazou cienginleh ka khiba hing kihawmta un ” ciin thu a peta hi. Neino deina,thûmna leh ngetna dungzuiin,sielching nâupangte’n Nântal hânkhûh a lâidoh(huotdoh) u’a, Neino in a pasal luong kihlung vadiang a mutah in lâidîpnâ sa mama kawmin,a nâmtem hiem,a lâidîpkuo toh a sutuo valien a, thakhat in,ama leh ama a kisunlia hi. Khumzouin, Nântal luong tungah a lumsuh a tuaciin hunkhat zou in Neino a sita hi. Tambang thute Phuthil in a zâh ciengin a dâ mama hi. Tua bepin,tuami khosung a mi gilou pawlkhat in,Neino leh Nântal ki-ît leh kingâi thu a zâh ciengun thangse mama u’a,hâgawi pum in,ashisa tegêl luong pên munkhat a kivui lâi vuiton lou dîng ciin vâi a’ng hawmta uhhi. A shisa tegêl kuo a’ng khuotdoh u’a,Neino luong pên lui-gâl lam ah a va vuita uhhi.Hun hing kivei zêl in,tua ,a kivuina mun ciet u’ah, mawng sing khat ciet a’ng pou tuohtuoh tahi. Tua mawngsingte pên a dawn lam,a’ng khang huoihuoi a, tuaciin a bâzâm gêl a’ng kikawituota gêl hi. A sinua un zong a kingâi nalâi uhhi;ci etsahna khat a’ng suohta mawh hi. Migiloute pen êngse mama u’hi. Khomipite a ciel u’a, tua mawngsingte a’ng phua sawmta uhhi. Mite’n mawngsingte a sâtsât u’a,hinan-leh,tua mawngsingte pên a pua thei mawngmawng tasih u’hi. Khomipite a gim sêngsêng zieh un, gilkiel dangta mamata uhhi. Tua singhlîm neiah a’ng khawl u‘a,a anphêlte uh ne dînga a’ng hon lâitah un,tuami mawngsing khu thakhat in, a’ng puasuh a pasal nempi a nenlia sieng tahi. Khomipite a thangpâi man un,tua mawngsing pen a sât teltel u’a; a ten nên dimdem u’a,hâltum dîngin munkhat ah a sepkhawmta uhhi. Tuazouin,a hâlsawm uhleh a kuongtheita malmal sih hi. Tua mawngsingte a kuontheilou bepin,a mawngsing tungah a’ng toukhawm u’a, sun ann a’ng netonta uhhi.Tuacia, ann a’ng nêh lâitah un,thakhatin mei a’ng kuong a,a khozâng pi un,a mei in,a kâng tumta uhhi. Tuazouin,thakhat in, meikâm(mei-âm) kuong singseng ni tah a’ng kilehtou a, a te sîlsiêl in,vânlâi zawl ah a lêngtou ta uhhi.
Vân ah âhsi ni in a tângden ta gêl hi.
Tuaciin,leitung tawp donga,Leitung mihingte theizing dîngin;vân ah âhsî ni in vântung sângah a tâng denta gêl hi.
Tungdim,Tungnung,Tunglut leh Tungte pen Phuthil leh Nântal hlâh leh suonte ahi uhhi. -
BY MK
No comments:
Post a Comment