WORKSHOP on GLOSSARY OF ZO CULTURAL VOCABULARIES 2008

Apeisa ni 24 July 2008 apatsa na kibawl "Workshop on Glossary of Zo Cultural Vocabularies" pen 2nd August 2008 niin lawchingtahin a kizouta hi. Tam bang Workshop pen ei NE India leh India pumpi a, dînga amasapên ahihi. Zo/Zou hâm leh tawndân khanletna dinga kibawl workshop ahi.

Tua hun ah, Zinlien Prof. T.N Pandit, former Director of Anthropological Survey of India in thu leh la hoi tampi a na gen hi. Dr. Subbakrisna of CIIL, Mysore in zong culture toh kisai thu leh la tampi a'ng peikhawmteng kungah a na hil hi. Prof. Subbarao a Doctorate from Illinois University(USA) in zong Tibeto-Burman ham/kam tungtang thu tampi na hil hi. Tua hun in, Dr. Pritha Chandra of IIT, Delhi leh Dr. Rajesh Kumar of Texas University(USA) te'n zong a'ng uop uhhi.

Vâidotna dîngin, Pu. Philip Mangkang, Chairman, Zoculsin in miliente pâpe piehna abânbân in,a phuongkhie a, tuachiin khatkhat in pâpe toh a kinousiet uh hi. Nu Rebecca Nuomzavung in Zinlien pâpe bawh khat in nousietna a'ng nei masa hi. Tuazou in, Nu Chingbawi in Dr. Subbakrishna pâpe bawh khat toh a'ng nousiet hi. Pa Haulienkap in, Prof. Subbarao pâpe bawh khat toh a'ng nousiet kia hi.

Nh.Jane Neipi in Dr.Pritha Chandra pâpe bawh khat toh nousietna a bawl hi. Tv. Lunzamung in Dr. Rajesh Kumar pâpe bawh khat toh atawpna dingin nousietna a bawl hi. Mipi a'ng peikhawmteng in kipâhpina etsahna in khut a kibêng chiet hi.

Tuazaw in, Chairman, Zoculsin in Welcome Speech genna a nei hi. Tam welcome speech pen http://zoculsin.blogspot.com/ tungah muthei in aomta hi. Tua hun in zong, Decade Old existence of ZOCULSIN '10th Year'anniversary celebration zong a kimangton pai hi. Tuachiin, 'International Year of Language 2008' chiin zong tami hunin lopna na kinei hi. Anêu alien in, nuomtahin tam workshop a mang chiet uhhi. Anzaluina zong thupitahin a na kinei hi.

Tam workshop zah hun in, Chairman, Zoculsin in Zou/Zo lah a, letsong/lawmman piehtâhteng khatkhat in, lawmman/award phuonna zong anei hi, tam lawmman mute pen http://zoculsin.blogspot.com/ tung ah etthei gige ahi.

Tam banga, lawmman piehna tungtang a, koipou genbuoina leh selbuoina nei a op leh, zoculsin blog ah sunthei gige ahi. Society khat in silhoi bawl sawm ahibou hi, chi khu thei chiet vai, tam society pen nam representative ahi sih a, Society/NGO level a nasem leh kitâhla ahibou hi, chi khu thei chietva ui.

Alem leh, October chiengin leh, Central Institute of Indian Languages, Mysore ah 10 days Linguistics Camp kineisawm ahi.